Netanyahu: Trumpimik ataatsimeeqateqarninni tigusat iperangaanissaat pingaarnertut sammineqarpoq
Trumpip Netanyahullu ataatsimeeqatigiinneranni tigusat aamma Iranimut ajugaanissarsuaq sammineqartut Netanyahu pingasunngornermi ullaakkut oqarpoq.
Israelip ministeriunerata Benjamin Netanyahup Washington D.C.-mi marlunngornermi assiga.
Assi: Jacquelyn Martin/Ritzau Scanpix
Israelip ministeriunerata Benjamin Netanyahup USA-p præsidentia Donald Trumpip ataatsimeeqatiginerani Gazami tigusat aniguisinneqarnissaat sammineqartoq pingasunngornermi oqaatigaa.
Nutaarsiassaqartitsivik Reuters taama allappoq.
Israelip ministeriunera Trumpip januaarimi præsidentitut aappassaanik ivertinneqarnerata kingorna pingasoriarluni Washington D.C.-mut tikeraarpoq.
Ataasinngornermi Trump Præsidentip illorsuanut pulaarpaa, marlunngormallu unnukkut Danmarkip nalunaaqutaa malillugu naapeqqittussaagaluarput. Sunali eqqartorneqarsimanersoq kingorna paasissutissiissutigineqanngilaq.
Netanyahup videoliaq hebræerisut ataatsimiinnermik pilugu oqaluttuartoq X-imi pingasunngornermi ullaakkut saqqummiuppaa.
Gazami tigusat iperagaanissaannik suliniutit saniatigut, siuttut marluk taakku "Iranimut ajugaaneq annertooq" eqqartorpaat, Netanyahu oqartoq Reuters allappoq.
Itisilerneqanngilarli.
Israelip Iranillu juunimi imminut saassuttaarnerat aallartippoq. Ullut arfineq-pingasut qaangiuttut USA-p saassussinermut ilanngulluni timmisartunik sakkutuunik Iranimut aallartitsivoq nunallu atomimik nukissiorfii pingasut saassullugit.
USA-p saassussineranit ullualuit qaangiuttut Iran Israelilu isumaqatigiillutik sakkuaakkunnaarput.
Sakkutooqatigiit Hamasip sakkutuuinik naalakkersuisunillu suujunnaarsitsinissaq aalajangiusimaneqartoq Israelip ministeriunera pingasunngornermi ullaakkut aamma erseqqissaassutigaa.
Hamasip Gazami suli 50-inik tigusaqarnera, taakkunanngalu 30-t toqusimasut ilimagineqarpoq.
Trumpip marlunngormat Netanyahumik ataatsimeeqateqarnini oqaaseqarfiginngilaa.
USA-p Kangiani Qiterlermi immikkut aallartitaa Steve Witkoffip sapaatip-akunnerata naannginnerani Israelip Hamasillu akornanni ulluni 60-ini sakkuaattoqarunnaarnissaa isumaqatigiissutigineqassasoq neriuutigalugu oqaatigaa.
Qatarip Egyptenip tapersersorpaa, USA-lu akunnermuliulluni isumaqatigiissitsiniarsarivoq. Qatarip illoqarfiisa pingaarnersaanni Dohami sapaatiummat aallartipput.
Nutaarsiassaqartitsivik AFP naapertorlugu Israelimit sakkutooqarnikkullu suliniaqatigiiffimmit Hamasimit sinnisut peqataapput. Ininili immikkoorlutik.
/ritzau/
