Netanyahu USA-mi sallulluni oqalunnerarlugu puussaarinerarlugulu Hamasip avoqqaaraa

Israelip ministeriunera Benjamin Netanyahu USA-mi kongressimi oqalugiarnermini „sallulluinnarpoq“ aamma „Israelimi, USA-mi nunanilu tamalaani isumaliutersuutinik puussaarivoq“.

Palæstinamiut sakkulersortui Hamasikkut pingasunngornerup unnuaani tusagassiorfimmut AFP-mut nalunaarumminni taamatut oqariartuuteqarput.

- Tigusat iperagaaqqullugit suliniuteqarnerulerluni Netanyahup oqaatigaa, tamannalu salluliorneruvoq aammalu Israelimi, USA-mi nunanilu tamalaani isumaliutersuutinik puussaarilluinnartoq, nalunaarummi allassimavoq.

- Taassuma Egyptenimiut Qatarimiullu eqqisseqateqarniarlutik parnaarussanillu iperagaanissamik isumaqatigiissuteqarniarlutik isumaqatigiinniarnerat akornuserpaa.

Gazami sorsunneq maanna atuuttoq oktobarip arfineq-aappaanni Israelimik saassussinermit aallartippoq, tassani Israelikkut kisitsisaataat naapertorlugit inuit 1100-t sinnerlugit toqutaapput 250-illu tigusatut tigusaallutik Palæstinap nunaata tungaanukaanneqarlutik.

Gazami saassussinerit ikinnerpaamik inuit 39.145-t inuunerannik naleqarput, taakkualu amerlanersaat sumiiffimmi peqqissutsimut ministereqarfik naapertorlugu sakkutuujunngitsuupput.

Israelip 2005-imi Gaza qimareerlugu nunasiffigeqqikkusunngikkaa, Benjamin Netanyahu USA-mi oqalugiarnermini oqarpoq.

Israelilli ungasinngitsukkut Gaza isumannaatsumik aqussinnaalissagaa erseqqissaatigaa.

USA-p sakkutuuinit sukkanerusumik ikiuineq Israelip sorsunneranik unitsitsinissamut iluaqutaasinnaasoq, taanna oqarpoq. Aamma oqarpoq Hamasikkut tunniutiinnaraluarpata tigusatillu tamaasa iperaraluarpatigit sorsunneq „aqagu“ unissinnaasoq.

Gazap immikkoortortaa Israelip, Egyptenip Immallu Akullersuup akornanniittoq, Danmarkimi qeqertatulli Mors-itut angitigaaq, tassanilu inuit 2,3 millionit missaanniipput.

Gazap immikkoortortaa siornatigut Egyptenimit Israelimillu naalakkersorneqaraluarluni maannakkut Hamasimit naalakkersorneqalerpoq.

/ritzau/