Netanyahup oqaatigaa kaannersuaqarnerarlugu nalunaarusiaq salloqittaanerusoq 

Nalunaarusiaq nutaaq, siullermeerluni Gaza-p ilaani nerisassaaruttoqarnera uppernarsarlugu nalunaarutigineqartoq, "toqqaannartumik salloqittaaneruvoq".

Taamatut isumaqarpoq Israelip ministeriunera, Benjamin Netanyahu.

Taassuma immikkut oqaatigaa nalunaarusiaq FN-ip tapersersugaanik nakkutiginnittarfimmit IPC-mit saqqummiunneqartoq, tassanilu oqaatigineqarpoq Gazap illoqarfiani aamma eqqaani sumiiffiit kaannersuaqarfiusut.

- IPC-p nalunaarusiaa toqqaannartumik salloqittaavoq ("outright lie", red.). Israel nerisassaarutsitsinissamik politikkeqanngilaq. Israel politikkeqarpoq nerisassaarunneq pinaveersaarniarlugu, Reuters naapertorlugu ministeriuneq tallimanngornermi nalunaarummini oqarpoq.

- Sorsunnerup aallartinneraniilli Israelip periarfissippaa,  ikiuutaasinnaasut tonsit milliuunit marluk Gaza-p killeqarfianut isersinnaasut, tamanna isumaqaarpoq inummut ataatsimut ikiuutaasut tonsi sinnerlugit.

Inuit 514.000-it missaanniittut maanna kaannersuarmik eqqugaasimasutut nalilerneqarput. Tassa Gaza-mi innuttaasut sisamararterutaat missaanniittut. Reuters naapertorlugu naatsorsuutigineqarpoq kisitsit septembarip naanerani 614.000-inut qaffassasut.

IPC-p siusinnerusukkut mianersoqqusivoq, Gaza-mi innuttaasut nerisassaarussimasut, kisianni maannamut uppernarsarneqarsinnaasimanngilaq nerisassaaruttoqarnersoq. Tassunga pissutaavoq paasissutissanik amigaateqarneq.

Sumiiffimmi taaneqartumi kaannersuaqarneq atuunnersoq paasiniarlugu, pingasunik uppernarsaataasinnaasunik piumasaqaateqarpoq:

Innuttaasut minnerpaamik 20 procentii nerisassatigut amigaateqarluinnartariaqarput, meeqqallu minnerpaamik 30 procentii kukkusumik nerisinneqarsimasariaqarput (inuussutissartaqanngitsunik, aaqq.), inuit 10.000-iugaangata taakku akornanni marluk nerisassaarunnermik toqussuteqarsimassapput.

Gaza-mi marsimiilli nerisassanik amigaateqarneq siaruarsimavoq, Israelip killeqarfiit ikiuutinik biilinut usisunut mattussimmalli.

Qaammatit marluk qaangiummata ikiuutinik assartuineq ilaannakortumik ammaaqqittoqarpoq, kisianni suli Gaza-mi palæstinamiunut nerisassanik naammattunik peqanngilaq.

FN-ip ikiuutinik ataqatigiissaarisua, Tom Fletcher, Israelip ikiuutinik matoorsimaneq nerisassaarunnermut pisooqataasutut oqaatigaa.

- Tassa kaannersuaqarneq pinngitsoortissinnaagaluarparput, periarfissinneqaraluarutta. Taamaakkaluartoq nerisassat killeqarfinnut katersuupput Israelip akornusersuineratigut, tusagassiortunik katersortitsinermi taanna oqarpoq.

Gaza-mi sorsunneq  aallartippoq 7. oktober 2023, Hamasip Israel Gaza-miit saassummagu.

Inuit 1.219-it toqutaapput AFP-ip kisitsisaatai naapertorlugit, kisitsisit pisortatigoortutut tunngavigalugit.

Tassunga ilanngullugu inuit 251-it Hamasimit tigusarineqarsimapput. 49-t suli AFP-ip malillugu Gaza-miipput. Israelip sakkutuuisa oqarnerat naapertorlugu taakkunannga 27-it toqutaapput.

Tamatuma malitsigisaanik Israel Gazami Hamasimut saassussilluni aallartippoq. Tassani palæstinamiut 62.200-t missaanniittut, amerlanerpaartaat inuinnaat (sakkutuujunngitsut sorsunnermullu attuumassuteqanngitsut) toqutaapput, nunap immikkoortuani peqqinnissamut ministereqarfiup nalunaarutigaa.

Amerlassutsit attuumassuteqanngitsunit uppernarsarneqarsimanngillat, kisianni FN-ip tatiginartutut isigai.

/ritzau/