AKILIUTIT AJUTOORNERAT
Nets-imi nutarterinerit suli ajornartorsiortitsisinnaapput
Nets-ip arfininngornermi ualilluarnerani unnukkullu ajutoortoqarneranut suna pissutaanersoq suli nassuiaatissaqanngilaq, sapaammilu ajornartorsiutinik suli naammattoorsisoqarsinnaasoq ilimasaarutigineqarpoq.
Suliffeqarfik akiliutinik isumaginnittartoq Nets arfininngornermi ualikkut unnuullu ilaa ajoquteqalerpoq, tamatuma malitsigisaanik nunani avannarlerni tamani nunatsinnilu kortimik akiliisarnernut ajornartorsiortitsilluni.
Asseq (toqqorsivimmit): Liselotte Sabroe/Ritzau Scanpix
Sapaammi suli allanngorartoqarsinnaavoq sumiiffinni assigiinngitsuni Nets' akiliinermut kiffartuussinerani, systemit terminalillu nutarterneqartariaqalersimanerat tassunga pissutaalluni.
Taamatut BT-mut sapaammi ilisimatitsivoq Nets'ip paasissutissiisarnermut pisortaa, Søren Winge.
Søren Winge naapertorlugu Nets-imi aaqqissuussinerit maanna nalinginnaasumik ingerlapput.
Nets suli nassuiaateqarsinnaanngilaq sooq akiliutinik aaqqissuussineq arfininngornermi unnukkut unittornersoq.
Suliffeqarfik kiffartuutaminut pitsaanerpaamik ilitsersuiniarluni sulisoq, Nets BT-mut ilisimatitsivoq.
- Allamik ilisimatitsisinnaanngilagut, taamaallaat ingerlanneqarnera ippassaq nalinginnaasumik ingerlanneqarpoq nalunaaqutaq 19 (danskit nalunaaqutaat malillugu, aaqq.) missaani - assigiinngisitaartumik tamanna malugineqarsinnaasimavoq nalunaaqutaq 22 (danskit nalunaaqutaat) tungaanut, Søren Winge BT-mut oqarpoq.
Taassuma ilanngullugu oqaatigaa Nets-imi ingerlanneqarnera qulakkeerniarlugu misissuinerlu pitsaanerpaamik ingerlanneqartoq.
Akiliutinik akiliiniarneq Nunat Avannarliit tamakkerlugit (nunarput ilanngullugu, aaqq.) akiliutinik isumaginnissalluni suliffeqarfiup ajutoornera ajornartorsiortitsivoq.
Danmark-imi ilaatigut ikaartarfissuarmi Storebæltsbroen-imi ajornartorsiortitsivoq, tassanilu biilertut utaqqisut amerlasuut akornanni iliuusissaaleqisitsivoq.
Sydsjællands aamma Lolland-Falsters Politi attaveqaqatigiinnermut X-ikkut nalunaarpoq, allaat sulisunut toqumik sioorasaaruteqartoqarsimasoq.
Ikaartarfissuarmi assiaqutit marluk nukersorluni ammarneqarsimapput, Sund & Bælt-imiillu (ikaartarfissuarmik ingerlatsisunit, aaqq.) nalilersorneqarpoq, biilertut taamaaliortut politiinut nalunaarutigineqassanersut.
Ajutoornerup akiliutit kortit tamaasa sunnerpai.
Tamanna aamma aliikkusiartarfimmut Tivolimut sunniuteqarpoq, tassani erinarsortartoq Tom Jonesimik tusarnaartitsileruttortoq pisoq pimmat.
Tusagassiuutitigut nalunaaruteqarluni Tivolimit oqaatigineqarpoq, aningaasatigut annaasaqarneq eqqortumik naatsorsorneqarsinnaanngikkaluartoq, taamaattorli naqissuserneqarpoq toqqaannartumik annaasaqarneq nalaanneqarsimasoq.
- Teknikkikkut ajutoortoqarsinnaasarpoq, kisianni pingaarutilimmik atortulersuunik ajoquteqartoqarpat, aqunneqarneranut paasissutissiineranullu sukaterisoqarnissaa pisariaqarpoq, Tivolip pisortaa, Susanne Mørch Koch, nalunaarummi oqarpoq.
- Tamanna atuuppoq unittoornermi aammalu ajoqusiiniarluni atortulersuutinik pisariaqarluinnartunik saassussisoqarsinnaaneranut. Arfininngornermi unnukkut pisup takutippaa, tassuuna nukittorsartariaqartugut.
