Nets-ip attaveerunnera atortorissaarutit ajoquteqarneranit pissuteqarpoq
Nets - akiliutinut attaviup - arfininngornermi ajortimmat, "atassuteqarfiit qaqutigoortumik ajoquteqarneranit" pissuteqartoq, Nets ilisimatitsivoq.
Assi. (arkiv): Signe Goldmann/Ritzau Scanpix
Arfininngormat akiliutit attaveerunnerannut akiliinermut atortorissaarutit teknikkikkut ajoquteqarnerat pissutaasimasoq paasineqarpoq.
Tamanna Nets-ip sisamanngornermi tusagassiuutinut nalunaarutaani allassimavoq, tassanilu allassimavoq attaveqaatini, „arlalinnut atassuteqarfiusuni“, „qaqutigoortumik ajoquteqarneq“ pissutaasoq.
Akiliutinik akiliinissamut attaviit ajortimmata, atortorissaarutit sillimmataasut ingerlaannartumik atulertussaasimagaluartut, atulersinnaasimanngillat.
- Systemip taama ajoquteqalertarnera qaqutigooraluartoq, taamaattoq arfininngormat takusatsitut ajornartorsiutinik kinguneqalerseqqeqqunagu aaqqiissutissanik maanna atulersitsiortorpugut, Netsimi pisortaq Allan Bonke tusagassiuutinut nalunaarummi oqarpoq.
Qarasaasiap ajoquteqarnera pissutigalugu biilertorpassuit Storebælt aqqusaarsinnaasimanngilaat, aamma Musik i Lejet-imi aamma Grøn Koncert-imi akiliutit ajorsimapput. Soorluuttaaq Kalaallit Nunaanni akiliutinik akiliiniarneq ajornarsimasoq.
Siusinnerusukkut Netsip oqatiginikuuaa ajoqutaasoq avataaneersunit saassussinikkut pinngitsoq.
Akunnerit pingasut missaanni atortorissaarutit attaveeruteqqapput.
Ajoqutigineqartoq suminngaanneernersoq paasiniarlugu Nets arfininngormalli misissuilersimavoq.
Inuussutissarsiornermut ministeeriaqarfiup ataasinngornermi Finanstilsyni qinnuigaa Nets-imit nassuiaammik, qanoq ililluni ajutoortoqarsinnaaneranik taamatullu pisoqarnissaanut Nets-ip qanoq upalungaarsimatigineranik nassuiaatitalinnik, pissarsioqqullugit.
Nets – 2020-mi Italiamiut akiliisarfissuannut Neximut tunineqartoq – Danmarkimi niuernermi kortimik akiliisarnerni 80 procentinit atorneqarpoq.
/ritzau/
