NIA-p qinikkatut arlalinnik inissisimaffeqarneq apeqquserpaa

Partiip Nuummi immikkoortortaqarfiata siulittaasuata partiip aasaanerani 2023-mi katersuunnerani arlalinnik qinigaaffeqartarneq annikinngitsumik apeqquserpaa isornartorsiuillunilu qinikkat immikkoortortaqarfinnut akuusarnerat annikippallaarnerarlugu.

Maanna immikkoortortaqarfiup siunnersuutaa ataatsikkut arlalinnik qinigaaffeqartarneq pillugu apeqqusiinera partiip oqartussaasuisa annerpaartaanni, ataatsimeersuarnermi oqaluuserineqartussanngorpoq.

- Nuummi inuit ataqatigiinni qinikkanik ataatsimeeqateqartarnermi ataasiarani eqqaaneqartarpoq inatsisartunut ilaasortaajutigalutik kommunemut ilaasortat suliassani assigiinngittuni sulinermut akimmisaarfeqartartoq, soorlu ataatsimiisitaliat sulinerminnut atatillugu angalaniaraluarlutik inuk ataaseq peqataasinnaanngikkaangat sulinissaraluaq kinguartinneqanngikkuni taamaatiinnarneqartarpoq.

Immikkoortortaqarfik apeqquteqarpoq, partiip taama ittumik ingerlatsineq akuersaaginnassaneraa imaluunniit marloqiusamik inissisimaffeqartarneq sapinngisamik pinaveersimatissinnaaneraa.

- Qinikkat marloqiusamik ilaasortaaffillit ataqqivagut isumaqaratta tamanna inunni ataasiakkaani nammineq aalajangigassaasoq, inummi nammineq qanoq nukissaqartigineq piffissaqartiginerlu apeqqutaaginnarput, kisianniliuna una pigipput takusinnaareerlugu sulianut assigiinngittunut qanoq kinguarsaataasartigisoq ilaatigullu allaat suliassat naammassineqanngittoorsinnaasartut qinikkat oqariartuutigisarmatigit, Ludvig Larsenip immikkoortortaqarfiup siunnersuutaa ilaatigut taamatut tunngavilersorpaa.

Nuummi inuuneq pitsaanerusariaqarpoq

Partiip Nuummi immikkoortortaqarfiata ataatsimeersuartunut isummersorfigitikkusutaa alla tassaavoq Nuummi inuuniarneq.

Sanaartornermi kvadratmeterimut akigitinneqartut qaffasissut, taassumalu kingunerisaanik ininik attartorneq akisoorujussuaq, pisortallu inissiaataannut attartortakkanut utaqqisarneq ukiuni 15-nik sivisussuseqarsinnaasartoq:

- Nunatsinni illoqarfiit pingaarnersaat Nuuk nunatta sinnerani najugaqartut atugarissaarfissuartut taaniartarpaat ilaatigut suliffissarpassuaqarnera nioqqutissallu akikinneruneri pisiniarfippassuaqarneralu pillugit. 

- Nioqqutissat akikinnerusinnaagaluartut Nuummi inuit ataqatigiinniit erseqqissaatigisariaqarparput Nuummi inuuniarneq imaannaanngissinnaammat ilaatigut inissaaleqinerujussuaq pissutigalugu, pisortallu inissiaatileqatigiiffiinut ini a/s-mut iserit a/s-mullu inissarsiortut ukiut 15-it utaqqisarnerat naliginnaavoq, taama illoqarfiup immikkoortortaata siunnersuutaa tunngavilersuutigineqarpoq.

Tamatuma saniatigut napparsimmavik kigutilerifiillu ulikkaaqqajuaannartut innuttaasullu tamaviaarlutik ullorpassuit atorlugit inniminniiniarsarisarisarnerat peqqissutsikkut sullinneqarumallutik innersuussutigineqarpoq, taamaammallu immikkoortortaqarfik kissaateqarpoq nakorsiartarfinnik namminersortunik pilersitsinissamut periarfissiisoqarnissaa kissaatigineqarpoq.

Naalakkersuinikkut aalajangiussat ersarissut kissaatigineqarput

Kisianni immikkoortortaqarfimmit ajornartorsiutinik illoqarfiit pingaarnersaannut tunngasunik taamaallaat sammineqanngilaq. Partiip immikkoortortaqarfia aamma siunnersuutinik saqqummiussivoq, taakku naalakkersuinikkut politikkimut eqqumaffiginninnerulersitsisut.

Assersuutigalugu immikkoortortaqarfik utoqqalinersiuteqartunut inuuneq naammagisimaarnartuussasoq kissaateqarpoq, taamaalilluni innuttaasut utoqqaligaangamik Danmarkimut nuuttariaqannginnissaat aqqutissiuunneqassasoq kissaatigineqarluni.

Kissaatigineqartoq alla tassaavoq inuussutissarsiorneq aningaasarsiornerlu pillugit naalakkersuinikkut aalajangiussat ersarissut, nunap aningaasarsiorneranut annertusaanissaq siunertaralugu.

Nunap namminiilivinnissaanut partiit akimorlugit suleqatigiinneq 

Immikkoortortaqarfiup ataatsimeersuarnermi oqaluuserisassanngortitaasa ilagaattaaq nunap namminiilivinnissaa pillugu apeqqut.

- Suna tamaat nammineq akisussaaffigilerutsigu nammineq aningaasalersortussaavarput. Ilaatigullu qallunaat nunaata nunatsinnut tapiissutigisartagai ullumikkut ukiumut 4 milliard-it missaaniittut pisarunnaartussaavagut. Taamaattumik nunarput pillugu namminiilivinnissamut isumaqatiginninniartussat imaannaanngittumik suliassaqarput qularnanngittumillu tamatsinnut annernarsinnaasumik aaliangiisariaqartassapput. 

- Taamaattumik sapinngisamik suleqatigiittoqartariaqarpoq tamatta suleqataasariaqarpugut immaqalu parti-it akimorlugit suleqatigiittoqartariaqassaaq, taama Nuummi Inuit Ataqatigiit siulittaasuat, Ludvig Larsen siunnersuummik tunngavilersuivoq.