Niels Thomsen Royal Greenlandimi siulersuisuni siulittaasunngorpoq

Naalakkersuisut siulittaasuat Jens-Frederik Nielsen (D) Royal Greenlandip immikkut ittumik ataatsimeersuarnerani aallarniilluni oqalugiarpoq.

Ingerlatseqatigiiffiup akiitsuisa appartinnissaat pingaarnersiorneqassasoq Naalakkersuisut siulittaasuata ilaatigut Royal Greenlandimut oqariartuutigaa.

Ingerlatseqatigiiffiup qullersaqarfia Nuummiissasoq Naalakkersuisut suli kissaatigigaat aamma erseqqissarpaa.

Tamanna ukiorpassuarni akerleriissutaasarpoq, ilaatigut ingerlatseqatigiiffiup pisortaa kingulleq Sverigemi najugaqarnera isornartorsiorneqartarluni. Susanne Arfelt Rajamandillu ukiuni marlunni pisortaareerluni februaarimi soraarmat, Royal Greenlandimi nutaamik maanna pisortassarsiortoqarpoq.

Jens-Frederik Nielsenip Maliina Abelsen siulersuisuni siulittaasuusimaneranut aamma qutsavigaa, Niels Thomsenilu siulersuisuni siulittaasutut nutaatut toqqarneqarsimasoq nalunaarutigalugu.

Maniguuttoq suliassaminulli piareersimasoq

Niels Thomsen Royal Greenlandimi siulittaasup tulliatut ukiuni kingullerni marlunni atuuffeqarpoq, maniguulluni suliassamulli piareersimalluni oqarpoq:

- Allannguisoqartariaqarpoq, maannakkutut ingerlaasoqaannarnissaanik kalaallit akissaqanngillat, Niels Thomsen oqarpoq.

Maliina Abelsen ukiuni sisamani siulersuisuni ilaasortaavoq, ukiunilu kingullerni marlunni siulittaasuulluni.

- Siulittaasuunera ataqqinaatigaara. Ukiut suliffiusimasut sukaataarfiusimaqaat. Sakkortusimavoq, Maliina Abelsen tunuarnermini oqarpoq.

Ingerlatsiviup ukiuni kingullerni ajornartorsiorsimanera aamma aningaasatigut amigartooruteqangaatsiartarnerit, siulittaasutut tunuartup tunuarnerminut atatillugu oqaaseqarnermini eqqartorpai.

Ingerlatseqatigiiffimmi allanngortitsinissamut periusissiaq malillugu sulisoqalereermat, 2027-mi 200 millionit koruunit sinnerlugit sinneqartoortoqarnissaa isumalluarfigalugu aamma oqarpoq.