Nipangersimasussaatitaanermik unioqqutitsisoqarsimaneraaneq pillugu aaqqiagiinnginneq annertusisoq
Erik Jensenip Naleqqami ilaasortaq Jens Napãtôk’ nipangersimasussaatitaanermik unioqqutitsisimasutut unnerluutigineqarsinnaanersoq pillugu politiit oqaloqatigai. Jens Napãtôq’ unioqqutitsisimannginnerarpoq Siumullu pisimasumut tamatumunnga atatillugu Siulittaasoqarfimmut unnerluussutaa itigartinneqarsimasiq innersuussutigalugu.
Assiliisoq: Leiff Josefsen
Aalisarnermut inatsisissaq pillugu Inatsisartuni akerleriinneq annertuseriaqqippoq.
Siumup siulittaasuata Erik Jensenip Inatsisartunut ilaasortaq Jens Napãtôk’ (N) pillugu politiit marlunngornermi oqaloqatigai.
Erik Jensen Sermitsiamut taama oqarpoq.
Erik Jensenip politiinut nalunaarutiginninnissaminik uppernarsaatissaqarluni isumaqarpoq. Napatôp aalisarnermut ataatsimiititaliap aalisarnermut inatsisissatut siunnersuutip suliarinerani nipangersimasussaatitaanermik unioqqutitsilluni paasissutissanik saqqummiussisimanera pillugu.
- Ataatsimiititaliami suliarineqarnera isumaqatigiinniarnernilu sumi inissisimaffeqarneq aalisarnermik suliffeqarfissuarmi piginnittunut ingerlateqqinneqarsimapput.
- Taamaaliorneq nipangersimasussaatitaanermik unioqqutitsineruvoq, Erik Jensen oqarpoq.
Napatôk’: Toqqissisimavunga
Jens Napãtôp tunniussiniarneq eqqissisimasumik tigugallarpaa. Pisoq Siumumit Inatsisartut Siulittaasoqarfiannut aamma nalunaarutigineqarsimasoq ilanngullugu oqaatigaa.
Politikerip oqarnera naapertorlugu Naleqqami ilaasortaq siulittaasoqarfimmi aalajangiinermik paasitinneqassanerluni apeqquteqarsimavoq, siulittaasoqarfillu oqaatsitigut ilisimatissimavaa Siumup maalaarutaa itigartinneqarsimasoq:
- Siulittaasoqarfimmit aalajangiineq allakkatigut tigunissaa maanna utaqqivara .
- Toqqissisimavungali, unioqqutitsisimanangalu, Jens Napãtôk’ oqarpoq. Politiinut tunniussiniarneq Siumumit aalisarnermut inatsisissatut siunnersuut pillugu isumaqatiginninniarnerni Jens Napãtôk’ peqataatinngitsoortinniarlugu Siumup periaasiisa ilagigaat taanna isumaqarpoq.
Erik Jensen: Uppernarsaatissaqarpunga
Erik Jensenip sooq politiinukarsimanini itisiliiffigiumanngilaa. Suliaq aamma Inatsisartut Siulittaasoqarfiannit suliarineqarmat.
Erik Jensen naapertorlugu Jens Napatôp paasissutissanik ingerlateqqiisimanera uppernarsaatissaqarpoq, uppernarsaatillu taakku politiinut tunniunneqassapput.
- Sooq politikkimi suleqatit politiinut unnerluutiginiarpiuk?
- Inatsisartut illersorniarlugit ilaasortallu imminnut tatiginerat illersorniarlugu taama iliorpunga. Tatigeqatigiinnermi innarlerneqaqqavoq.
- Partiimut attuumassuteqanngilaq, maannalu oqartussaasut tamanna nalilersortussanngorpaat, Erik Jensen oqarpoq.
