Nipikinneq, pisukinneq

Qummoroortartunik pisissaarnikuuvunga. Ukioq manna qummoroortaatinik amerlasuunik pisinngilanga. Anaanatut meeqqanik decembarimi januaarimilu inuuissiortartunik meeraqarlunga kisimiittunngorama, pingaarnersiuisariaqarnera ingerlaannaq paasivara. Meeqqat inuuissiortarneri pingaarnerutippakka. Soorunami.

Taamaammat qummoroortartut pisiassannit peerpakka, sulilu utinngillat. Aningaasarpassuarnimmi akiliilluni sekundialunni qaarpallannik tusaasarnermi suna siunertaava? Isiginnaassallugilli nuannareqaakka. Haha. Qummoroortaatinik pisinissamut akissallit qujamasuutigisaqaakka, taakkumi pisisunuinnaanngitsoq nuannaalersitsisarput. Qujanarujussuaq.

Ikittarnerilumi aamma nuannarinngisaannarpakka, taamaammallu pisinnginnissamut patsisinut tamanna aamma ilaavoq. Ukiortaap gregorip ullorsiutai 1582-mi atulikkavut malillugit ukiumit ukiumut ikaarsaarnerput nalliussisarpaa. Ullorsiutit taakku malillugit ukioq nutaaq januaarip aallaqqaataani aallartittarpoq. Ukiortaarli ukiuni tuusintilippassuarni nalliussineqartarpoq. Kulturitoqarsuarni, soorlu ruumamiuni babyloniamiunilu, ukiortaaq piffissani assigiinngitsuni nassiussineqartarpoq, nalinginnaasumik ukiup immikkoortuisa nikinneranni ullukinnermiluunniit. Ila uatsinniit allaanerusumik ukiup nikinnera nalliussisarsimassavaat…

Qassimmita ukiortaami allannguinissamik suli neriorsuisarpat? Uanga taamaaliorsimanngilanga. Meeraangama angerlarsimaffitsinni atugaanngillat, maannalu arlalinnik patsiseqartumik immitsinnut pitsaasumik iliornissatsinni piffissaq aalajangersimasoq utaqqisassanngikkipput siunnersuutaavoq. Ukiortaami neriorsuinissamut ”piffissamik eqqortoqanngilaq”, ileqqut piffissap ingerlanerani pileriartortarput, ukiortaarlu sioqqullugu piumassuseq tammarsinnaasarpoq, tamatumalu saniatigut ukiortaami neriorsuutit eqquutinngitsoortarput, taamaammat naak ukiortaarnissaanut ullut amerlajunnaaraluartut aallartiinnartoqarsinnaavoq.

Siunnersuutitsialak ukiualuit matuma siorna tusagara ingerlateqqikkusuppara. Januaari sikaavinnik, nillataartitsivimmik qeritsitsivimmillu nerisassanik imaajaanermut atoruk. Mamartorpassuit toqqortaapput, peqatigisaanillu taamaaliornikkut januaarimi, amerlanernut takisoorsuannguuttartumi aningaasanik sipaartoqarsinnaavoq.

2000

40-riarlunga ukiutoqarsiorsimavunga. Immaqalluunniit maanna 40-russaat? Hmmm.... qanorluunniilli pisoqaraluartillugu unniut taakku assigiinngitsorujussuupput, ataaserli assigiissutigikannerpaat, tassa nammineq ilaquttakka, ilaqutassatut toqqakkakka ataatsimoorlutaluunniit ulloq nalliussisarparput. Unnuit eqqaamasat amerlasuut, ataaserli allanit tamanit eqqaamajuminarneruvoq. Ukiut tuusintilikkaat nikinnerat. Tamanna suli eqqarsaatigalugu pikkunarpoq.

Når... Susoqanngilarmi. Taassumali tungaanut assut pissanganarsimavoq. Tusagassiuutini nunarsuup aserornissaatut uippallertoqarpoq. Taamaariarluni ulloq qarasaasiat silarsuaanni ajornartorsiutit annersarigaat paasivara.

What the fuck…? Ullut… Ullorsiutitoqqammi suli pigaavut. Ulloq manna tikillugu uissannissaarsuaq malersugaasutut misigiuartut tamanna pilersitarineraat naluara. Utimut ullut taakku eqqaagaangakkit oqariartuutit imminnut assortuuttut marluupput. Nunarsuaq aserussaaq, qarasaasiamilu, taamanikkut kikkunnit tamanit suli pigineqanngitsuni, ulluliisoqarsinnaajunnaassaaq.

Kiisamilu qummoroortaatit aallakaatileratsigit, taamanikkut Kalaallit Nunatsinni internetimi nutaajusumi aarleqqutit initunngivipput. Oqaluttuarisaanermi pingaarutilimmi peqataasutut misinnarpoq. 16-nik ukioqarpunga efterskoleminngaannillu juullimut feeriarpunga, anaanammalu pakkutaarlunga ukiup 2000-nngornera illaatigersuaarlutigu eqqaamavara. oqaatigiuminaatsoq. Eqqumiitsoq. Sulilumi eqqumiitsutut misigisarpara.

Seerpallak

Heksehylit – Upernavimmiutut malersuisartut – qanoq pisoqaatiginerat ilisimanngilara, meeraagallaramali inuusukkallaramalumi tassa qummoroortaativissuagut. Taamanikkut poortat 100-nik imallit 5 koruuneqarput. Pilluarnassusia!

24-iata kingorna qummoroortaatit ammarniapallattarpagut, ullualunnili utaqqisariaqartarpugut, kinalu piseqqaartuunersoq pissangalluta utaqqisarparput.

Qanoq assigiinngitsigisumik atorsinnaaneri kingumut eqqarsaatigalugu tupinnarpoq. Meeqqakkali ullumi taamaaliortinnavianngilakka. Taamanikkut ullumilumi qummoroortaatit mianerisussaavagut, aallanngitsoortullu uterfigissanngilagut, heksehylili eqqortumik kiigutsigu, aallarnani qaassaaq. Eqqortumik tutigutsigu allatut nipeqarluni aallassaaq. Aallalivinnissaa sioqqullugu tigummisinnaagutsigu, nilliaatigaluni silaannakkut piumasaannarminnik ingerlassaaq. Aliikkutavissuaq!

Qummoroortaatit pikkunarnerit takkussulerneri eqqaamavara, taakkuli eqqaamalluanngilakka. Heksehylimmi eqqaamanerpaavakka.

Heksehylinik ukiorpaalussuarni ikitsisimananga meeqqama misiliinissaat nallerpoq. Allanngorsimappulli. Meeqqamma nuannarigaluarpaat, allanngorsimappulli. Qangatut nipeqarunnaarsimapput. Qamiaarnerusarput. Tassa heksehylit, meeqqakkaanngitsoq. Tamannalumi aamma isumassaqarluarpoq, tamakkumi assigiinngitsuni ilisimasaqarnerulernerput ilutigalugu isumannaanneruleriartorput, taamaakkaluartoq. Naaguna nipaat pikkunartoq?

Ullumikkulli pisutut allattariaqanngikkaluarpakka. Meeqqammami sanianniinnissara pisariaqartikkunnaarsimavaat. Aappillernaasak. Uuminaq. Taamaammallu ukiualunni heksehylinik ikitsisimanngilanga. Taarsiulluguli mianersornissaminnik neriorsorsuataartarpaannga, taavalumi nammineertittarpakka. Tassa alakkarnissaasa tungaanut. Nillerpallanneri tamarmik quarsaarnartarput, sekundialuillu qaangiukkaangata illarpalunnerat tusartarpara.

Ukioq manna heksehylinik piumassanersut pissanganassaaq.