Niuernermik Ilinniarfik Nuummiittoq nutaamik forstanderertaartoq

Kista Isaksen Niuernermik Ilinniarfimmi Nuummiittumi forstanderinngortoq Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfiup nalunaarutigaa.

NI-mi inuussutissarsiornermut tunngasunik ilinniakkanillu akunnattunik sivisussusilinnik ilinniartoqarsinnaavoq.

Kista Isaksen naalakkersuisoqarfimmi atorfimmininngaanniit soraarluni forstanderinngussaaq, aammali allaffissornermi pisortatut, ilinniartitaanermut pisortatut aamma Niuernermi Ilinniarfimmi forstanderiugallartutut ukiut ingerlanerini sulisarnikuulluni.

- Taakkua saniatigut Kista Isaksen allaffissornermik sulialittut misilittagartuujuvoq, kommunini namminersortunilu sulisarnikuulluni. Naalakkersuisoqarfiup forstanderimik nutaamik suleqateqarnissi qilanaarivaa, naalakkersuisoqarfimmi pisortaq Nuka Kleemann oqarpoq.

Isaksen septembarip aallaqqaataani atorfittaamini aallartissaaq.