Niviarsissat Tusass High5Girlsilu peqatigalugit pinngortitaq teknologiilu misilittaavigigaat
Nuummi Sisimiunilu niviarsissanut workshopertitsinermi imaani timmissat, atoqqiinikkut teknologiimi aaqqiissutissiornikkut piujuartitsisoqarsinnaanera ilinniartitsissutigineqarput.
Assi: Tusass
Tusassip High5Girls suleqatigalugu Nuummi Sisimiunilu niviarsissanut ilisimatusarneq, teknologi, pilersitsineq aammalu kisitsisilerineq sammillugit pikkorissaavoq.
Peqataasut misilittagaqalernissaat pinngortitarlu pillugu ilinniagalinnik maligassiuisunik naapitsinissaat siunertarineqarpoq.
Imaanit timmissanit VR-imut aamma atoqqiinermut
HIGH5GIRLS
High5Girls Marianne Andersenimit 2018-imi pilersinneqarpoq. Inuusuttuulluni ingeniørinngorniarnermini maligassiuisunik amigaateqarsimavoq, ukiunilu 25-ni Med Tech-imi tunisassianik niuernermillu ineriartortitsisartutut sulisimanermini nunarsuarmut tunniussaqarnissaminik pisariaqartitsisoqartoq paasivaa. Niviarsiaqqanut ilisimatusarneq, teknologi, pilersitsineq aammalu kisitsisilerineq pissanganartorpassuaqarnera takutikkusullugu periarfissanillu nutaanik pilersitserusulluni High5Girls.
Piffissap ingerlanerani arnat arlallit High5Girls-imut ilanngupput, peqatigiillutillu suliniaqatigiiffik namminersortoq High5Girls sunniuteqarluartoq pilersillugu.
Najoqqutaq: High5girls.dk
Nuummi “Biology Camp” qulequtaralugu ilaasut 18-it uumassusilerinerup silarsuaanut, imaani timmissat, silap pissusaa aammalu piujuartitsineq pillugit paasisaqarfigaat. ”Nuannertorujussuuvoq. Unammillertilluni, ataatsimooqatigiinnerlu nuannersuaarluni – ingammik nivissat allat atuarfinni allaneersut ilisarisimalerlugit nuanneqaaq," peqataasut ilaat oqarpoq.
Pinngortitaleriffimmi ilisimatusartup Aili Lage Labansenip ilisimasani niviarsissanut ingerlateqqippai:
- Nivissanut ilaasunut ilisimasannik avitseqatiginnissinnaanera assut nuannerlunilu pissarsiaqarnarpoq. Nivissat tunniusimallutik, alapernaallutik suleqataarusummata ajornannginaaqaara.
VR-ip silarsuaani periarfissat pillugit Tusassimeersoq Nivi Thomassen Olsen saqqummiivoq.
- Ilisimasanik aallaaveqarluni alapernaassinnaaneq aammalu allatulaaq atortulerluni nassuiaariaaseqarsinnaanerup qanoq iluaqutaatigisinnaanera Campip takutippaa, oqarpoq.
Sisimiuni campimi “Eqqagassamiit isumalluutinut” qulequtarineqarpoq, tassani peqataasut eqqagassat silap pissusaanut pinngortitamullu illersuisinnaasunik pilersinneqarsinnaanerat sammineqarput.
Pilersitsisoq Marianne Andersen ulluinnarnilu aqutsisoq Mette Meltinis High5Girls-imeersut suleqatigiinneq nersualaarpaat:
- Maligassiuisut Aili, Uiloq aamma Nivi, ilisimasaminnik, piumassutsiminnillu takutitsillutik saqqummiineq assut pikkoriffigaat. Suleqatigineri assut pissarsiaqarnaqaat aammalu maligassiuisunik piffinneersunik aammalu Tusassimiit suleqateqarsinnaasimaneq qujamasunnarluni.
