Nuannannersuaqarpoq – Demokraatit qinersinermi ajugaasutut isikkoqarput
Demokraatit partiit annersarileraat, aaqqissuisuuneq naliliivoq. Nunatsinni politikkikkut sulinermi allannguinerujussuaq anguneqarpoq, Sermitsiami aaqqissuisuuneq naliliivoq.
Der er god stemning ved Demokraatits valgfest.
Assi: Oscar Scott Carl
Demokraatit qinersinermi ajugaapput, partiinilu anginersanngorlutik.
Nalunaaqutaq 01.00 missaani tamanna ersarissilluinnarpoq. Taasinerit 26.000-ingajaat maana kisinneqarsimalerput.
Sermitsiami aaqqissuisuuneq Masaana Egede naliliivoq:
- Demokraatit qinersinermi allannguerujussuarput. Tassami aalisarnermut inatsisip allanngortinnerani ersarissumik isornartorsiuisimapput. Qineqqusaarnermilu aamma ersarilluinnartumik innuttaasut atugaat qanimut sammisimallugit, Masaana Egede oqarpoq.
Demokraatit partiit annersarilertussatut isikkoqarput, taamaasillunilu Jens-Frederik Nielsen naalakkersuisoqatigiilernissamut isumaqatiginninniartussatut isikkoqalerpoq.
Qinersinerup naammassinerata kinguninngua partiit siuttui KNR-imi oqaloqatigineqarmata, Demokraatit siulittaasuat Jens Frederik Nielsen ima oqarpoq:
- Isumaqarpunga
oqariartuutigut inuiaqatigiinnut ersarittumik apuunnikuullugit. Kisianni
naatsorsuutigisimanngikkaluarparput taamatut qinersineq allannguitigissasoq.
Taamaattorli soorunami nuannaarpugut, kisianni aamma nalunnglarput akisussaafferujussuaq
maannajkut tunniunneqartoq. Oqaloqatigiinnerit isumaqatiginninniarnerillu
aatsaat aallartittussanngorput, taamaattumik qinersineq naammassigaluartoq
aatsaat politikkimi sulineq aallartilerpoq, Jens-Frederik Nielsen oqarpoq.
Demokraatit siulittaasuat oqariartuuteqarpoq partiit ammasumik oqaloqatigisinnaajumallugit.
Illuatungerluinnaani naalakkersuisoqataasimasut Siumut qinersisartunit pillarneqarujussuarput.
- Qineqqusaarnermi ersarilluinnarsimavoq partii assigiinngisitaartunik isummerlunilu ilumminilu avissaartuuffeqarsimasoq, Masaana Egede oqarpoq.
Aaqqissuisuunerup immikkut maluginiarpaa Naleraq illoqarfinnit nunaqarfinnilu siuariarujussuarsimasoq.
- Pingaartumik Aki-Matilda Høegh-Dam taajuunneqarujussuarpoq, partiilu aamma taajuunneqangaatsiarluni. Partii ataatsimut isigalugu siuariarujussuarpoq, taasinerillu malunnaateqarluartut aasinnaasimallugit, qinersisartut tusaaneqartutut misigilluinnarsimammata, Masaana Egede oqarpoq.
Inuit Ataqatigiit eqqarsaatigissagaanni aaqqissuisuuneq naliliivoq:
- Malunnarluinnarpoq Inuit Ataqatigiit illoqarfiit annernit annaanneqartoq, taamaattorli illoqarfinni minnerni nunaqarfinnilu unammilligassaqartoq, taakkunanimi taajuunneqarluartaraluaramik. Angusaqarluarput, malunnaatilimmilli kinguariarlutik, tassami 2021-mut sanilliullugu 15,3 procentpointinik kinguariaramik Masaana Egede oqarpoq.
