KL

DK

Nukissiorfiit: Innaallagiaarunnermik aatsaat taamaattumik misigisaqarpugut

Nuuk innaallagiaarummat Nukissiorfiit pissutsinit immikkut ittunit unammillerneqarput, taakkulu illoqarfiit pingaarnersaanni sivisuumik innaallagissamik pilersitseqqinniarnermut pissutaapput. Ingerlatseqatigiiffiup innaallagiaarunneq taamaattoq aatsaat misigaa.

Sapaatip-akunnerata naanerani Utoqqarmiut Kangerluarsunnguani erngup nukinganik nukissiorfimmit sarfap aqqutaani ingerlatsissutip nakkarsimanera innaallagiaarunnermut pissutaavoq.
Tusagassiortoq
Saqqummersinneqarpoq

Sooq Nuummi innuttaasunut tamanut innaallagissamik pilersuinissaq taama sivisutigisumik ingerlasimanersoq, sapaammi unnukkut Nukissiorfiit itinerusumik nassuiaapput. Ingerlatsissutip amigaataasup “equngasutut ittumik sarfap sakkortussusianik pissarsiaqalersitsinera” pissutaalluni inuit ilaat innaallagissamik pilersorneqarput allalli pilersorneqaratik.

Sapaatip-akunnerata naanerani Utoqqarmiut Kangerluarsunnguani erngup nukinganik nukissiorfimmit sarfap aqqutaani ingerlatsissutip nakkarsimanera innaallagiaarunnermut pissutaavoq. Taama Nukissiorfiit sapaatiummat ualikkut nalunaarput, pissutsilli immikkut ittut pissutigalugit innuttaasut qamittoornermik misigisaqarsimasut innaallagissamik pilersorneqarnissaat sivisuneruvoq.

- Ingerlatsissutip amigaataasup illoqarfik sarfap sakkortussusianik equngasutut ittumik pissarsiaqartippaa, tamannalu siullertut pisoqarfiusumi arlallit sarfamik pilersorneqartut allat pilersugaajunnaarput. Taamatut equngasutut ittumik sarfap sakkortussuseqarnera kukkussutaasup nassaariniarneranik ajornakusoortitsivoq, Nukissiorfiillu sarfamut aqqusaarussummik amigaateqartoqarnera inerniliissutigimmagu Nuummi ajornartoorfimmi innaallagissiorfik aallaqqaataaniit aallartinneqartariaqartussanngortippaa, taamaattumillu taassuma pilersuinermik ingerlatsilersinnaalernissaanut, aammalu illoqarfimmut sarfap sakkortussusianik pissusissamisoortumik pilersuilersinnaalernissaanut Nuummi innaallagissamik atuisartunut tamanut qamitsitsisoqartariaqarsimavoq. Sarfap equngasutut ittup nassatarai pumpit, serverit, aammalu innaallagissamik atuisutut atortut allat ingerlasinnaajunnaarneri, taamaalillunilu suliffippassuarnik, aammalu inunnik innaallagissamik atuisartunik akornusersuivoq, tusagassiuutinut nalunaarummi Nukissiorfiit ilisimatitsipput, itisiliillutillu: 

Motoorit nillorsimasut

- Tassunga aamma ilaapput pumpit, nalinginnaasumik ajornartoorfimmi innaallagissiorfimmi motoorinik kissassimaartitsisuusartut, taamaammallu taakku unimmata motoorit nillorsimapput. Motoorit ilaasa aallartinnissaannut kissassuseq aalajangersimasoq pisariaqarmat aallartitsiniarneq sivisunerusimavoq.

Ingammik innuttaasut innaallagissamik kiassagaasut piffissaq sivisunerusoq kiassarneqarfiunngitsoq misigaat, taakkumi attavilernissaannut nalinginnaasumut naleqqiullugu tamanna sarfamik annertunerusumik pisariaqartitsimmata.

Taamaalilluni innuttaasut ikittukkuutaartillugit Nukissiorfiit attavileqattaartariaqarsimagai ilisimatitsissutaavoq, tamatumani suli qamittooqqinnermik pinngortitsisumik annertunerusumik artukkiinissaq pinaveersinniarlugu.

Taamatut ittumik qamittoornerup ilusaanik Nukissiorfiit iluani aatsaat misigisaqarlutik Nukissiorfiit nassuiaapput, tassalu erngup nukinganik innaallagissiorfimmit sarfap aqqutaanik ingerlatsissummik annaasaqarfigisaminnik, taamaakkaluartorlu Nuummi atuisartut tamarmik ataatsikkut qanittoortoorfiginngisaannik. 

- Uagut aamma sarfanik equngasutut ittunik ilungersortinneqarpugut, nalunaarummi ingerlatseqatigiiffik ilisimatitsivoq.

transmissionslinje strømnedbrud inuiaqatigiit nukissiorfiit nuuk samfund vandkraftværk

ATORFIIT Se alle jobs

Powered by Labrador CMS