Nukissiorfimmi pisortaq tunuarpoq
Cicilie Senderovitz septembarip ulluisa 30-anni atuutilersumik Nukissiorfinni pisortatut tunuarpoq. Tamanna illuatungeriit isumaqatigiissuteqarnerisigut pisoq, Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik paasissutissiivoq.
Utoqqarmiut.
Foto: Departement for Landbrug, Selvforsyning, Energi og Miljø.
Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik nutaamik pisortassarsiortussanngorpoq.
Cicilie maajip aallattaaqaani 2022-imi Nukissiorfinni pisortatut atorfinippoq.
Taanna Nukissiorfiit aaqqissuussaanertut nutaamik eqqarsaateqarfiginissaanut ajunngivissumik suliniuteqarpoq. Pisortatut aaqqissuussaanermi teknikkinut tunngasut pulaffigilluarsimavai aammalu periusissiat sammilluarsimallugit. Sulisut akornanni atugarissaarnerulersitsisinnaasimavoq, peqatigisaanillu aningaasaleeqqinnissanut pisariaqartunut politikkikkut eqqumaffiginnilersitsisimalluni.
- Naalakkersuisut aamma Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik sinnerlugit Cicilie Nukissiorfinni kusanartumik suliniuteqarsimaneranut qutsavigaara. Cicilie suleqatigilluartorujussuusimavarput, tamatumani tatigeqatigiinneq malunnarsimalluni aammalu pisortat pilersuinerisa qulakkeernissaasa nukittorsarnissaatalu iluatsilluarnissaa ataatsimoorluni kissaatigineqarsimalluni.
- Peqatigisaanik Cicilie siunissami iluatsitsilluarnissaannik kissaappara, neriuutigaaralu Nukissiorfinni pisortanngortussap sammiveqarluartumik ingerlatsineq Ciciliep ingerlassimasaa, ingerlateqqissagaa, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund allappoq.
