Nunami namminermi naligiissitaanermut ullorititaq: Angutinut naleqartitat angutit naligiissitaanerannut akornusiisarput
Arnat angutinit amerlanerusut qaffasinnerusumik ilinniagaqartut. Angutit ajornartorsioraangamik tapersersorneqarnissamik ikiorneqarnissamilluunniit piumasaqarnissamut ajornakusoortitsinerusarput. Imminorsimasunilu kisitsisini angutit amerlanerunerat takuneqarsinnaapput. Naligiissitaanissaq arnanuinnaq tunngassuteqanngilaq, inuiaqatigiinnulli tunngassuteqarluni. Taama Naalakkersuisut marluk nalunaarput, tikkuarlugulu angutit ikiorneqarnissamut akornutaat ikilisarneqartariaqartut pisariaqartinnerarlugu.
Assimi takuneqarsinnaasarpoq ilinniagaqartut assilisat. Arnat amerlanerit ilinniagaqarnerusarput. Inuiaqatigiinni kikkut tamarmik akisussaaffigaat suiaassutsimik assigiinngisitsinermik akiuiniarneq, Naalakkersuisut erseqqissaatigaat.
Leiff Josefsen
Naalakkersuisut nukappiaqqat angutillu naligiissitaannginnermik eqqorneqartarnerat, maajip 20-ani, nunami namminermi naligiissitaanerup ullorititaani oqariartuutigiumavaat.
Naligiissitaanermut Naalakkersuisoq Naaja Nathanielsen (IA) aamma Meeqqanut, Inuusuttunut Ilaqutariinnullu Naalakkersuisoq Aqqaluaq B. Egede (IA) nukappiaqqat angutillu atugaannut tunngatillugu pingasunik ernummatigisaqarlutik tikkuaapput.
Taakkua tassaapput:
- Angutit nukappiaqqallu ileqqunit aammalu angutit allanngortikkuminaatsumik nuannaartorineqarnerannik killilerneqarput.
- Angutit nukappiaqqallu kiserliornermik, angerlarsimaffeqannginnermik atornerluinermillu aammalu imminut toquttarnermut tunngatillugu ajornartorsiornerusarput.
- Angutit nukappiaqqallu ilinniartitaanerni ingerlaqqiffiusuni ikinnerujussuupput.
- Taakkua tamaasa ataatsimoortillugit kingunerisaannik anguterpassuit nukappiararpassuillu periarfissanik tamakkiisut atunngitsoortarpaat aammalu inuunerminnut imaluunniit inuiaqatigiinni ilaaffigisaminni sunniuteqanngitsoortarlutik. Tamanna angutit inissisimaffinni sunniuteqarluarfiusartuni amerlanerussuteqarnerannit aammalu angutit arnaniit isertitaqarnerujussuusarnerannit allaanerulluinnarpoq. Taamaattumik angutit takorluukkatik anguniagaqarfigisatillu iluatsinngikkaagamik, imminnut iluatsinngitsoornerusutut misigilersinnaasarput, pissutigalugu angutit nuannaartorineqarneranniimmat nukittuujussasut qullersaassasullu, naalakkersuisut allapput.
Suiaassuutsinut isiginnittariaatsit aalajangersimasut akiorneqassapput
- Angutit timimikkut nukittuujullutik nuannaartorineqarnerisa nersorniarneqartarnerat, sunnertiassusaa tapersersorneqarnissamillu pisariaqartitsinerat nakkarsaatigineqartarluni, annertoorujussuarnik sunniuteqartarpoq. Angutit nukappiaqqallu kamannerat saassussiniartarnerallu akuersaarneqartarpoq aammalu misigissutsinik takutitsinertut ajunngitsutut akuerineqartarluni, ernumassuteqarneq, nalornissuteqarneq qullilinerlu kanngunartutut isigineqartarlutik, naalakkersuisut nalunaarummi allapput.
Naaja Nathanielsen aamma Aqqaluaq B. Egede oqaaseqaatiminni erseqqissaapput kikkut tamarmik akisussaaffigigaat angutit arnallu pillugit isummiussereertarnerit atorunnaarsinnissaat, taamaalillutik nukappiaqqat angutitullu misigissutsiminnik ersersitsisinnaanerat aqqutissiuunneqarnerulerniarlugu.
- Ilinniartitaanerni suiaassuseq aammalu suiaassutsini ileqqussat ammanerusumik qanoq suliaqarfigisinnaanerivut qulaajarlugit Naalakkersuisuni aallartippugut. Ilinniartitaanerit meeqqanut inuusuttunullu ukkatarinniffiusut, kisianni aamma ilinniartitaanerit suiaassutsini naligiinngiffiunerpaajusut, immikkut isiginiarpagut, Naalakkersuisut allapput.
