- Suliami aalajangersimasumi ernumanartoqartoq tusaraangakku inuttut nammineerlunga ileqqorissaarrnikkut politikkikkullu akisussaaffeqartutut misigisarpunga.
- Suliami aalajangersimasumi ernumanartoqartoq tusaraangakku inuttut nammineerlunga ileqqorissaarrnikkut politikkikkullu akisussaaffeqartutut misigisarpunga.
Tamatta malitassatsinnik eqqartuussiveqarpugut, taamaammat tamanna eqqumaffigisariaqarpara.
Taama oqarpoq IA-meersoq Aaja Chemnitz, arnap filippiineersup, Kalaallit Nunaanni Eqqartuussivinni RS Servicesimut unnerluutiginnissummi ilisimannittutut nassuiaasussap, nunamit anisitaanissaanik suliamut maanna akuliuttoq. Nunamit anisitsineq, AG-p sapaatip akunnerani 38-mi allaaserisaatut, arnap nunamiinnissaa 2025-mi februaarip naanissaata tungaanut sivitsorneqarmat, unitsikkallarneqarpoq.
- Suliffimmi atugassarititaasut pitsaasuusariaqarput. Sulisitsisut ilaasa sulisuminnik atornerluinerat Kalaallit Nunaannut iluaqutaanngilaq. Maannakkut malittarisassat atuuttut taamaatsillugit sulisitsisut sulisumi sulisinnaanermut akuersissutiminnik arsaarneqarnissaannik siorasaaralutik atornerluinissaat taamaaliornikkullu sulisuminnik attassisinnaanissaat aarlerinartoqarpoq, Aaja Chemnitz isumaqarpoq.
Nakkutilliineq
Inatsit naapertorlugu sulinissamut najugaqarnermullu akuersissummik tunisineq ataqatigiipput, Kalaallit Nunaannilu allamik suliffittaarusukkaanni nunamut allamut imaluunniit nunagisamut aallaqqaariarluni qaammatit pingasut qaangiuppata sulinissamut akuersissummik allamik qinnuteqaqqittoqartariaqarpoq.
- Sulisitsisut nunami najugaqarsinnaanermut akuersissummik arsaarinninniarlutik sioorasaaralutik sulisuminnik atornerluinissaat pinaveersaartinniarlugu qanoq iliuuseqarfigineqarniarnersoq Nunanut Allanut aamma Nunat Allamiunut Akuutitsinermut Ministeri Kaare Dybvad Bek apeqquteqarfiginikuuara. Taamatuttaaq sullivimmi piumasaqaatit nunanit allaneersut sulilernerminni najoqqutarisassaat malinneqarnersut qulakkeerniarlugu suliaqarfimmi sullivimmi piumasaqaatit atugassarititaasullu pillugit qanoq akulikitsigisumik nakkutilliisoqartarnersoq akissutiserusuppara, Aaja Chemnitz oqarpoq.
Sulisut nunanit allaneersut SIRI, Styrelsen for International Rekruttering og Integration, aqqutigalugu aaqqissuussaq fast track aqqutigalugu Kalaallit Nunaanni sulipput. Kalaallit Nunaanni suliffeqarfik sulisunik nunanit allaneersunik sulisoqarnissaminut akuerisaagaangat akuersissut tunniunneqartarpoq. Akuersissummi suliffeqarfiup suliaqarfimmut atatillugu nunatsinni isumaqatigiissutit eqquutsisinnaassagai piumasaqaataavoq.
Akisussaaffik
SIK-p suliaailkkiutaani arnap Filippinerineersup ilisimannittutut nassuiaateqarfigisassaani SIK-p nunatsinni suliffeqarfik ilaatigut akissarsititsinikippallaangaatsiarsimalluni isumaqatigiissummik eqquutsitsisimanngitsutut eqqartuussivimmut sassartinneqartussatut suliakkiutigaa. 372.000 koruunit pallillugit piumasaqaateqarpoq. Arnaq kingorna allami suliffittaarsimavoq, suliffeqarfillu RS Services eqqartuussivimmut sassartinneqartussanngortinneqarnermi kingunerisaanik aaqqissuussamit fast trackimit peerneqarsimavoq.
- Atugassarititaasut pitsaasuunissaat Danmarkimit, matumani SIRI-mit akisussaaffigineqarpoq. Malittarisassat malinneqarnissaat pillugu politikeritut sulininni akisussaaffeqarpunga. Arnap suliffeqarfimmi isumaqatigiissutinik eqquutsitsinngitsumi atugassarititaasunik eqqartuilluni sassartup pillarneqarnissaa ilumoorsinnaanngilaq. Ernumanarpoq, Kalaallit Nunaannilu tamanna piumaneqanngilaq, Aaja Chemnitz oqarpoq.
Ministeri Kalaallit Nunaat pillugu ataatsimiititaliamiit apeqqut akissallugu sapaatip-akunnerinik pingasunik piffissaqarpoq.
