Nunamut attuumassuteqartuunissamik piumasaqaat sukateriffigineqassaaq

Aalisarnermut piniarnermullu Naalakkersuisoqarfiup paasisutissaatai naapertorlugit ullumikkut nunatsinni akiliisitsillutik piniariartitsisartut 25-it missaanniipput.

Taamaattorli misigisassarsiorluni takornariaqarnerup annertusiartorpasinnera ilutigalugu, taamaalillunilu aamma akiliisitsilluni piniariartitsisarnerit amerliartortussanut naatsorsuutigineqarluni, aammalu taakku qaavatigut Inatsisartuni partiit sakkortusiartortumik piumasaqarput aaqqissuisartut nunatsinnut attuumassuteqartuunissaat qulakkeerneqartariaqartoq, tamakku malitsigisaannik Naalakkersuisut piumasaqaatit sukateriffigineqarnissaannik siunnersuuteqarput, pingaartumik akiliisitsillutik piniartitsisartut nunatsinni inuiaqatigiinnut attuumassuteqarnerat eqqarsaatigalugu.

- Nunatsinni aalajangersimasumik najugaqartussaatitaanermut piumasaqaatip ukiunut tallimanut sivitsorneqarnissaa pillugu siunnersuummut tunngaviuvoq akiliisitsilluni aallaaniarnermik aaqqissuussisartut inuiaqatigiinnut kalaallinut attuumassuteqarnissaat pillugu piumasaqaatit sukateriffigineqarnissaat kissaatigineqarmat, aalisarnermut piniarnermullu Naalakkersuisoq, Kim Kielsen (S) siunnersuummik saqqummiussissummini erseqqissaavoq nangillunilu:

- Kissaatigineqartoq taanna 2023-mi Piniarneq aallaaniarnerlu pillugit inatsisip Inatsisartuni suliarineqarnerani saqqummiunneqareerpoq, Naalakkersuisullu suliarineqarnissaanut matumuuna qaqippaat. Tammajuitsussarsiorluni piniarnerup neqeroorutigineqarnerani pisariaqartinneqartumik misilittagallit najukkami ingerlataqartut kiisalu piniakkanik isumalluutit atorneqarnerini piujuartitsinerup siuarsarneqarnissaata qulakkeerneqarnissaat siunertarineqarpoq.

Taassuma saniatigut Naalakkersuisut siunnersuuteqarput inuit Kalaallit Nunaannut attuumassuteqartut, kisianni nunami allami najugaqartariaqartut akuersissummik qinnuteqarsinnaanissaat pisinnaatitaaffeqarnissaat qulakkeerneqassasoq.

Ataatsimiititaliamit sukaterissutaasinnaasut allat misissorneqassapput

Partiit Inatsisartuniittut siammasissumik isumaqatigiikkaluartut, aammalu partiit annersaat Inuit Ataqatigiit siunnersuut taamatut iluseqarluni akuerineqassasoq innersuussigaluartut, partiit assigiinngitsut oqaaseqaatitik aqqutigalugit piumasaqarput inatsisissatut siunnersuut allatigut aamma suli annerusumik sukateriffigineqassasoq.

Suli sukaterinerusoqarnissaanik kissaateqartoqarneranut assersuutitut taaneqarsinnaavoq tammajuitsussarsiniarluni piniariartitsinermi pisarisat niaqui tiguinnariarlugit uumasut timaanik qimatsiinnartarneq atuutissanngilluinnartoq.

Naleqqap tungaanit piumasaqaatigineqarpoq tammajuitsussanik piniartitsisarnermi aamma nannunniarsinnaatitaanissaq periarfissaasariaqartoq, partiillu allat ilaatigut piumasaqarput nunap immikkoortuini allani tammajuitsussarsiniartunut piniartitsisarnermi periarfissat siammasissumik periarfissarsiuunneqartariaqartut. Taakkualu saniatigut partiit sukaterissutaasinnaasunik allanik aamma ujartuipput ataatsimiititaliami suliarineqartussanngortitanik.

Tuttut, umimmaat, ukallit, timmissat aamma puisit

Takornariat aamma nunatsinni innuttaasut ingiallorneqarlutik tammajuitsussarsiniarluni piniariarnissamik kissaateqartut, taamatut piniariartitsinissaminnut akuersissutaatilinnut akiliillutik piniariarsinnaapput.

Akiliilluni piniariartarnerit, aalisarnermut piniarnermullu naalakkersuisoqarfik naapertorlugu, pingaartumik Kangerlussuup nunataani pisarpoq, ukiuuneranilu qimusserluni umimmanniartitsisoqartarluni aammalu aasaanerani umimmammik tuttunillu piniariartitsisarput.

Kitaani Naternami Kujasinnerusumilu Ivittuuni kiisalu Tunumi Ittoqqortoormiini aamma akiliisitsilluni tammajuitsussanik piniartitsisoqartarpoq. Taakku saniatigut aamma Nuup eqqaani akiliilluni tuttunniarneq, ukalerniarneq, puisinniarneq aammalu timmiarniarneq ingerlanneqarsinnaallutik.

Kalaallit Nunaata sinnerani sumiiffinni allani, periarfissat suunersut apeqqutaallutik aamma akiliisitsilluni piniariartitsinernik allagartalinnik peqarsimappat periarfissat naapertorlugit piniariartitsisoqarsinnaasarpoq.

Siunnersuutip aappassaaneerneqarnera novembarip 15-iani pissaaq, pingajussaanillu aalajangiisuusumik suliarinninneq pilersaarutigineqarpoq pissasoq novembarip 21-iani.