Nunani allani najugaqartunut aqutsisoqarfik ukiuni 20-ni Kalaallit Nunaannut tunngatillugu malittarisassanik kukkusumik atuutsitsisimasoq
Ajoqersuisut nunanit allaneersut Kalaallit Nunaannut isernissaannut malittarisassat 2004-mili kukkusumik ingerlanneqarsimasut pisortat siorna aatsaat paasivaat.
Danmarkimi nunanut allanut ministeri Kaare Dybvad Bek pisoq pillugu Naalakkersuisunut Folketingimullu utoqqatserpoq.
Assi: Asger Ladefoged/Ritzau Scanpix
Nunani allani najugaqartunut aqutsisoqarfiup upperisarsiornikkut ajoqersuisut nunanit allaneersut Savalimmiunut Kalaallit Nunaannullu isersinnaanerannut tunngatillugu 2004-miit 2024-mut malittarisassanik kukkusumik atuutsitsisimapput.
Naak Folketingimut nalunaarusiami tamanna allassimasoqaraluartoq ukiuni 20-ni Kalaallit Nunaanni aamma ajornartorsiutaasimasoq siornatigut tamanut saqqummiunneqarsimanngilaq. Kukkuneq Sermitsiap Nunani allani najugaqartunut ministeriaqarfimmi allagaatinik takunnissinnaanermigut paasivaa.
Allaffimmi pisortap Naalakkersuisut immikkoortortaqarfianni pisortaq 2024-mi novembarip 15-ianni ima nalunaarfigaa:
– Ajoraluartumik Nunani Allani Innuttaasunut Aqutsisoqarfiup piffissami pineqartumi qinnuteqartut upperisarsiornikkut oqaluussisartutut il.il. suliaqarnissamut tunuliaqutaqarnertik uppernarsassagaat piumasaqaatigisimavaa, taamatuttaarlu qinnuteqartut ilaqutaasullu qinnuteqaqatigisatik pisortanit ikiorsiissutinik pilersorneqartassanngitsut oqaatigisimavaa. PIumasaqaatit taakku marluk Kalaallit Nunaanni atuunnatik Danmarkimi taamaallaat atuupput.
Suliareqqinneqartariaqartunik suliassaqanngitsoq
Allaffimmi pisortap nalunaarutaa nunanut allanut ministerip Kaare Dybvad Bekip isumaginninnermut, ilaqutariinnermut, suliffeqarnermut nunamullu namminermut tunngasunut naalakkersuisoqarfimmit novembarip 18-ianni allagarneranik tulleqartinneqarpoq.
Ministerip kukkuneq ajuusaarutigaa, naalakkersuisuusimasullu Jess Svanep saaffiginnissut novembarip 26-ani tigusimallugu nalunaarutigaa. Aamma Folketingimi Kalaallit Nunaat pillugu ataatsimiititaliaq kiisalu nunani allani najugalinnut akulerutsitsinermullu ataatsimiititaliaq ilisimatinneqarput.
Upperisarsiornikkut oqaluussisartut Kalaallit Nunaannut isersinnaanerannut tunngasut 23-t ukiuni 20-ni suliarineqarsimasut nunani allani najugalinnut aqutsisoqarfik ilisimatitsivoq. Taakkunannga 15-it siullermeerlutik qinnuteqartuusut arfineq-pingasut sivitsoqqiinnissamut qinnuteqartuupput. Sulialli taakkua arlaannaalluunniit itigartitsivigineqarsimanngilaq. Taamaammat suliat taakkua arlaat suliarineqaqqittariaqanngillat. Tamanna Jess Svanep oqiliallaatiginerarlugu ministerimut allappoq.
Kukkunerup aqutsisoqarfimmi iluarsineqarneraniit Naalakkersuisunut nalunaarutigineqarneranut sooq piffissaq taama sivisutigisoq ingerlasimanersoq Sermitsiap maajip aallartinnerani Nunanut allanut ministereqarfik aperaa. Akissutisinissaq sapaatit akunnerini pingasuni utaqqisimavarput, sulilu utaqqivugut.
