“Nunaqarfiga Kusanartoq” unammisitsinermi ajugaasoq
Sarfannguani innuttaasut nunaqarfimmut ataatsimoorussamik nipilsornermik grillfestimillu akissarsipput
Sarfannguani innuttaasut nunaqarfimmi saliillutik ulappupput “Nunaqarfiga Kusanartoq” unammisitsinermi ajugaallutik.
Assi: Privat / KNI
KNI A/S-p Royal Greenlandillu suleqatigiillutik suliniutaanni nunaqarfiit 16-t “Nunaqarfiga Kusanartoq” unammisitsinermi peqataapput.
Nunaqarfiit peqataasut ataatsimoorlutik eqqakkanik katersillutik avatangiisinik eqqiluinnerusunik pilersitsiniarlutik ulappupput, tamannalumi suliniutip siunertaraa.
Sarfannguit unammisitsinermi ajugaasutut makitaasoq, KNI Royal Greenland-lu tusagassiorfinnut nalunaarumminni allapput:
Sarfannguani eqqagarpassuit ataatsimoorluni katersorneqarput.
Assi: Privat / KNI
- Sarfannguarmiut ajugaanerminnut atatillugu nalliuttorsiussapput, tassani KNI aamma RoyalGreenland nunaqarfimmi innuttaasunut nipilersortussanik grillerinermillu aaqqissuussissapput. Nipilersortartut nuannarineqartut Patrick Nuunulu appisimaarumaarput. Grillerisoqassaaq aamma kikkulluunniit peqataaqqullugit nuannisaaqataaqqullugillu kajumissaarusuppavut, KNI Royal Greenlandilu tusagassiuutinut nalunaarumminni allapput.
Ingerlatseqatigiiffiit unamminermi sapinngisamik nunaqarfiit amerlanerpaat peqataatikkumallugit eqqugassaqartitsinissamik toqqaasimasut, KNI-p HR-imi, Attaveqatigiinnermi Piujuartitsinermilu pisortaa, Juliane Henningsen Heilmann allappoq:
- Akisussaassuseqartumik eqqagassalerinissaq aamma nunaqarfiit amerlanerusut saligaatsuutinnissaat uani qitiutinneqarpoq.
- Nunami asseqanngitsumik kusanartumi najugaqarpugut, aamma kikkulluunniit avatangiisini eqqagassarpassuaqarfiunngitsuni peroriartorsinnaasariaqarput, pisortaq allappoq.
