Nunaqarfinni illut aserfallassimasut amerlaqisut

Sinerissami nunaqarfinni illut aserfallassimasut amerlasoorujussuuput, illuutillillu nutarterinissaannut periarfissat pitsaanerulersinniarlugit qanoq suliniuteqarnersoq pillugu, Inatsisartunut ilaasortaq, Hans Enoksenip, Naleraq, paragraf 37 atorlugu Nalaakkersuisunut apeqquteqarpoq.

Nunaqarfinni illut amerlasuut aserfallatsaaliorneqannginnerinik ajornartorsiut Naalakkersuisut eqqumaffigigaat, taamaattumillu illunut sanaqataaffiusunut taarsigassarsiat pillugit lnatsisartut inatsisaata allanngortinneqarneratigut, illut sanaqataaffiusut sulilu taarsigassarsiissutinik akilersuiffiusut nutarterneqarnissaannut kommunalbestyrelsit taarsigassarsisitsillutillu tapiissuteqarsinnaalissasut, tamannalu illut nutarterneqartartut amerlanerulerannik kinguneqarnissaa naatsorsuutigigitsik, Ineqarnermut Attaveqaatersuinermullu Naalakkersuisoq Hans Peter Poulsen, Siumut, akissuteqarluni allappoq.

Illunillu nutaanngilisimasunut nutarterinissamut periarfissat suli pitsaanerusariaqartut suliarlu malersoqqissagini, Hans Enoksen erseqqissaavoq.

Oqilisaassisoqassasoq

Nammineerluni illuliat, kingornalu sanaqateqarluni illuliat, illoqarfinni nunaqarfinnilu ukiut ingerlanerini sananeqartarsimapput, illunilli tamakkuninnga nutarterinissamut periarfissat killeqarnerat pissutaalluni illut amerlasuut aserfallassimasut takussaapput, illuutillillu illuutiminnik nutarnerinissaannut periarfissaat pitsaanerusariaqartut, Naalakkersiusut isumaqarput.

llluliortiternernut aningaasalersuineq pillugu lnatsisartut inatsisaat 2017-imeersoq naapertorlugu, illunik pioreersunik nutarterinissami aningaasartuutit tamarmiusut 40 procentii tikillugit, annerpaamilli 300.000 koruuninik taarsigassarsisoqarsinnaavoq. Tassunga tunngatillugu utoqqalinersiutillit aningaaserivimmit taarsigassarsitinneqarsinnaanngitsut, allatigulluunniit aningaasalersuinissaminnut periarfissaqanngitsut 300.000 koruuninik taarsigassarsitinneqarsinnaapput.

Tamannali illuutillit ilaasa pisariaqartitaannut tamakkiisumik matussutaanngimmat, illunut sanaqataaffiusunut taarsigassarsiat pillugit lnatsisartut inatsisaata allanngortinneqarnissaanut siunnersuut, lnatsisartut 2023-mi ukiakkut ataatsimiinnerini Naalakkersuisut saqqummiuppaat. Allannguutissatut siunnersuut pineqartoq kommunalbestyrelsit pilersaarutaasumik aserfallatsaaliuinissanut, illut sanaqataaffiusut sulilu taarsigassarsiissutinik akilersuiffiusut, nutarterneqarnissaannut kommunalbestyrelsit taarsigassarsisitsillutillu tapiissuteqarsinnaanissaannik imaqartoq, lnatsisartut 2024-mi upernaakkut ataatsimiinnerini atuuttussanngorlugu akuersissutigaat.

Tamannalu inoqarfinni mikinerusuni illuutillit aserfallatsaaliuinissami, nutarterinissamilu aningaasalersorneqarnissaannut atatillugu, illunik sanaqataaffiusunik piginnittut unammillernartitaanut naammassinnissasoq naatsorsuutigineqartoq, Naalakkersuisut Ineqarnermut Attaveqaasersuutinullu Naalakkersuisoq, Hans Peter Poulsen, Hans Enoksenimut akissuteqarluni allappoq.

Iluaqutaavallaarnavianngitsoq

Illunik nutarterinissamut periarfissat Naalakkersuisut taakkartugaat qangali periarfissaareersut naammanngitsut, periarfissallu illuutilippassuarnit ilisimaneqanngimmata qaammarsaanerit aallartinneqartariaqartut, Hans Enoksen isumaqarpoq.

Illut sanaqataaffiusut, tassa sanasumik ikiorteqarluni sanaajusut, sulilu taarsigassarsiissutinik akilersuiffiusut, nutarterneqarnissaannut kommunalbestyrelsit taarsigassarsisitsillutillu tapiissuteqarsinnaalissaannik periarfissaq illuutilippassuarnut iluaqutaanavianngitsoq, Hans Enoksen oqarpoq.

- Isorliunerusuni illunik sanaqateqarluni illuliorniaraanni sanasunik ikiortigineqarsinnaasunik pissarsinissaq ajornakusoortorujussuuvoq, tamannalu pissutaalluni sanaqateqarluni illuliortitsineq iluatsinnikuunngiivippoq.

- Naalakkersuisut oqilisaatissatut taakkartugaat iluaqutaanavianngilaq, taamaattumik pineqartoq pillugu Naalakkersuisunut nutaamik apeqquteqaatissara maannakkut suliaraara, taanna oqarpoq.

Nammineerluni illuliorsinnaanermut periarfissaq Naleqqamiit siunnersuutigineqartoq Inatsisartut upernaakkut ataatsimiinnerani akuersissutigineqarpoq.

Nunaqarfinni nammineerluni illuliat aserfallassimasut amerlaqisut, nutarterinissarlu siunertaralugu aningaasanik taarsigassarsititsinissamut periarfissat maannakkorniit suli pitsaanerusariaqartut, Kalaallit Nunaani Nunaqarfiit Peqatigiiffianni, KANUNUPE-mi siulittaasoq Ingvar Motzfeldt isumaqarpoq.