Nunarsuarmi saqqummersitsinermi eqqissiviilliornerit malunnaateqarput

Danskit nalunaaqutaat naapertorlugu sapaammi ullaassakkut nunarsuarmi saqqummersitsineq ammarneqarpoq Osaka, Japanimi.

Nunat nunarsuullu immikkoortortai 160-it teknologiimik, kulturimik nerisassanillu takutitsipput.

Saqqummersitsinerni ilaapput ullorissap anaa Marsimeersoq aammalu silassorissuusiaq atorlugu uummatiliaq, stamcellinit sananeqarsimasoq.

Danmark, Finland, Island, Norge Sverigelu ataatsimoorlutik peqataasut nunat avannarliit pavilloniannik taasami, Erhvervsstyrelsip nittartagaani allassimavoq.

Pavillonimiippoq 17 meterinik portutigisoq orpissuarmit ilusilersugaq, piffissaqanngitsuunermik piujuartitsinermillu ersersitsisussaq. Taamatuttaaq pisiniarfik, qulaatungaani café-lik aammalu avannaani naatsiivittut ilusiligaq.

Nunarsuarmi saqqummersitsineq, nutaarsiassaqartitsivik AFP naapertorlugu, nunarsuarmi 2025-imi pisut eqqissiviilliornertaqaqisut ersersippai.

Ukrainep saqqummersitsiviani sungaartumik tungujortumillu qalipaatilimmik allassimavoq "Tuniniarneqanngilaq". Taanna tassaavoq nunap sorsuffigineqartup præsidentiata Volodymyr Zelenskyj oqaasiinik issuaaneq.

2022-imiilli Rusland nunamut tassunga sorsunnera aallartippoq, Ruslandilu nunarsuarmi saqqummersitsinermi peqataanngilaq.

Israelip saqqummersitsinera aamma palæstinamiunut tunngavoq. Tassaniippoq ujarak Jerusalemimi Qinusarfiup iigarsuaneersoq.

- Eqqissinerup oqariartuutaanik nassarpugut, Yahel Vilan, Israeli pavillonip aqutsisua oqarpoq.

Israelip sorsuutigisimavaa Hamasimik taaseqataasoq palæstinamiut illersugaat 7. oktober 2023 aallarnerfigalugu - ukiup ingerlanerani sakkuaannartitsinermik unillatsiarnermi minillugu.

Amerikap saqqummersitaa qulequtaqarpoq "America the Beautiful", kalaallisuunngortillugu "Amerika kusanartuuvoq".

Saqqummersitsineq nunap pinngortitaanik, AI-teknologiimik avataarsuanillu imaqarpoq. Tassani ilaatigut raketsip aallartinnera takutinneqarpoq, tassani qerititsisartut supoortitsipput isiginnaartut niaquinullusooq serpartaallutik.

Kina-p saqqummersitaa, Amerikap saqqummersitsivianut qanittumiittoq, teknologiimik avatangiisinut naleqquttumik aammalu ulloriaasiornerup iluani Chang'e-5-mit misiliutit qaammammit tigusat saqqummersinneqarput.

Nunarsuarmi saqqummersitsinermi siunertaavoq inuiassuarnut tunngasutigut unammilligassat aaqqiissutissarsiorfiginissaat.

Nunarsuarmi saqqummersitsineq siullerpaamik ingerlanneqarpoq Londonimi 1851-mi. Taamanili saqqummersitsineq nunaniit nunanut ingerlaarsimavoq kingullermillu Dubai-mi 2021-mi ingerlanneqarpoq.

AFP naapertorlugu nunarsuarmi saqqummersitsinerit isumassarsiorfigalugit Eiffeltårnet Parisimiittoq pilersinneqarsimavoq.