Nunasisut Asiameersut nunap inuisa amerlassusaanik patajaatsitsipput
Ukioq kingulleq piffissamut matumunnga sanilliullugu innuttaasut amerlassusaat allannguuteqarpallaanngilaq, Asiamili inunngortut 281-inik amerleriarsimapput, Naatsorsueqqissaartarfiup naatsorsuinerata nutaap tamanna takutippaa.
Naatsorsueqqissaartarfik naapertorlugu piffissami matumani Nuummi innuttaasut 19.772-it najugaqarput, ukiup siuliani piffissami pineqartumit 11-nik ikinnerullutik.
Assiliisoq: Merete Lindstrøm
Juulip aallaqqaataani innuttaasut amerlassusaat Naatsorsueqqissaartarfiup saqqummiuteqqammerpaa.
Ukiuni kingullerni Asiamit nunasisorpassuit nunap inuisa amerlassusaannut patajaallisaasut kisitsisaatit takuteqqippaat.
2024-mi juulip aallaqqaataani Kalaallit Nunaanni inuit 56.836-t najugaqartut, Naatsorsueqqissaartarfiup kisitsisaataasa takutippaat. Ukiup ataatsip matuma siornarnit 29-nik ikinnerullutik.
Danmarkimi inunngorsimasut ikinnerusut
Innuttaasut Kalaallit Nunaanni inunngorsimasut ukiup siulianut sanilliullugit 193-inik ikinnerusut, taamatullu Danmarkimi inunngorsimasut 123-nik ikinnerullutik 3.991-inik amerlassuseqartut naatsorsueqqissaartarfik ilisimatitsivoq, imatullu allappoq:
- Ukiup ataatsip ingerlanerani Asiami inunngorsimasut 281-inik amerlanerulersimapput, 1.396-init 1.677-inut (20,1 pct.) qaffassimallutik.
2017-imiilli, tassa 56.000-it inorlugit nunap innuttaassuseqarneranit, maannamut innuttaasut 56.836-ulernissaanut innuttaasut amerliartornerat ataani takussutissami takuneqarsinnaavoq.
Grafik: Kalaallit Nunaanni Naatsorsueqqissaartarfik
