Nunat Avannarliit Siunnersuisooqatigiivi pillugit akerleriinneq sakkortusiartorpoq – Mútep suleqatigiinneq unitsikkallarpaa

Nunat Avannarliit Siunnersuisooqatigiivini Kalaallit Nunaata inissisimaffia Naalakkersuisut siulittaasuata Múte B. Egedep (IA) ukiaq isornartorsiorpaa.

Suleqatigiinnermi sammisat pingaarnerpaat eqqartorneqartillugit Kalaallit Nunaat peqataatinneqarneq ajortoq siulittaasoq oqarpoq, Nunallu avannarliit siunnersuisooqatigiivisa ataatsimiinneranni oqalugiarnermini naligiinnerusumik suleqatigiinnissaq ujartorpaa.

Nunat Avannarliit Siunnersuisooqatigiivinik naalakkersuisut akornanni suleqatigiinnerup unitsikkallarneqarnissaanik, ataatsimiinnernullu tulliuttunut peqataannginnissaminik allakkami ammasumi marlunngormat nalunaaruteqarluni, Múte B. Egede maanna allamik iliuuseqarpoq:

- Peqataasut akornanni immikkoortitsisoqartarluni aaqqissuussinermi peqataasarneq ingerlatiinnarsinnaanngilara. Sunniutigisassaa tassaassaaq, Kalaallit Nunaat sinnerlugu Nunani Avannarlerni Siunnersuisoqatigiinni peqataasassanngitsunga, taamaalillungalu aamma ukiamut Reykjavikimi Nunani Avannarlerni Siunnersuisooqatigiit Ataatsimiinnerani aamma peqataassanngilanga, marlunngormat siulittaasoq taama nalunaarpoq.

"Nato-mi ataatsimiiararnermut" peqataatinneqanngitsoq

Múte B. Egedep oqarnera naapertorlugu nunani avannarlerni suleqatigiit naalakkersuisuisa siuttuisa aasaanerani ataatsimiinnissaannut, Tysklandip aamma peqataaffigisassaanut, Kalaallit Nunaata peqataatitaannginnissaa, taama nalunaaruteqartoqarneranut pissutaavoq.

Naalakkersuisut siulittaasuat naapertorlugu Savalimmiut, Åland Kalaallit Nunaallu qaaqquneqassanngitsut Nunat Avannarliit Siunnersuisoqatigiivini siulittaasoqarfimmit Sverigemit nalunaarutigineqarpoq, ataatsimiinnermi nunanut allanut, isumannaallisaanermut illersornissamullu politikki kisimi sammineqarumaarmat.

Tamanna Múte B. Egedep tupigusuutigaa, tassami nunani avannarlernut tunngatillugu Kalaallit Nunaat nunani kisiartaalluni Issittumeersuummat, maannakkullu nunanut allanut, illersornissamut sillimaniarnermullu politikkimut tunngatillugu annertuumik sammineqartuulluni. Tassungalu tunngatillugu Kunngeqarfik Danmarkimi nunanut allanut, illersornissamut sillimaniarnermullu politikkikkut susassaqarfinnut tunngatillugu eqeersimaartumik Kalaallit Nunaat peqataammat.

- Ajuusaarnarpoq naalakkersuisut siuttuattut taamatut alloriartariaqalerlunga misigisimagama, kisianni suleqatigiinneq ataqqeqatigiinnermik naligiimmillu pineqarnissamik tunngaveqartussaavoq, Múte B. Egede allakkami ammasumi oqarpoq.

Aaqqiissutissarsisoqassasoq ministeriunerup neriuutigaa

Sverigep siulittaasoqarfianut Kalaallit Nunaata saaffiginnissutai malinnaaffigisimallugit, ministeriuneq Mette Frederiksen Sermitsiamut oqarpoq:

– Sverigep siulittaasoqarfiup Naalakkersuisullu oqaloqatigiinnerat malinnaaffigisimavara. Nunat avannarliit suleqatigiinneranni Kalaallit Nunaata Savalimmiullu inissisimaffitsik pitsaanerpaaq pissarsiarisariaqaraat, Nunat Avannarliit Siunnersuisooqatigiivinut nammineerlunga oqareerpunga.

- Kalaallit Nunaannit nalunaarut maannakkut tusarliunneqartoq tusaatissatut tiguarput, siunissamilu aaqqiissutissamik nassaartoqarsinnaassasoq neriuppunga, Marienborgimi aaqqissuussinermut atatillugu ministeriuneq Mette Frederiksen Sermitsiamut oqarpoq.

Nunani Avannarlerni Siunnersuisooqatigiit ataanni qulequttat tamaasa pillugit oqalliffinni tamaginni nunat ilaasortaasut allat naligalugit Kalaallit Nunaat naligiimmik atugassaqartinneqarluni peqataassasoq, Nunani Avannarlerni Ministerit Siunnersuisooqatigiivisa Siulittaasoqarfiata kiisalu Nunani Avannarlerni Siunnersuisooqatigiit Siulittaasoqarfiata isumaliutersuutigeqqissappassuk akuerissappassullu, suleqateqarnerup unitsikkallarneqarnera pillugu aalajangerneq Múte B. Egedep isumaliutersuutigissavaa.