Nunat Avannarliit Siunnersuisoqatigiivi piffissami matumani ilungersunartorsiorfiupput.
Nunat Avannarliit Siunnersuisoqatigiivini siulittaasoq, Islandimi inatsisartunut ilaasortaq Bryndís Haraldsdóttir taama oqarpoq. Taassuma oqaatigaa – nunarsuarmi pissutsit nalorninartorsiorfiusut eqqarsaatigalugit Nunani Avannarlerni ataatsimoornissaq pingaaruteqartorujussuusoq.
Nunat Avannarliit Siunnersuisoqatigiivi piffissami matumani ilungersunartorsiorfiupput.
Nunat Avannarliit Siunnersuisoqatigiivini siulittaasoq, Islandimi inatsisartunut ilaasortaq Bryndís Haraldsdóttir taama oqarpoq. Taassuma oqaatigaa – nunarsuarmi pissutsit nalorninartorsiorfiusut eqqarsaatigalugit Nunani Avannarlerni ataatsimoornissaq pingaaruteqartorujussuusoq.
- Nunat Avannarliit Siunnersuisoqatigiivisa qanoq aaqqissuuteqqinnissaat naniniartariaqarparput. Ikinngutigilluakkatta Kalaallit Nunaata Savalimmiullu siunnersuisoqatigiinnut ilaajunnaarnissaat pinngitsoorumallugu,
Islandimi aviisit annersaanni Morgunbladid-imi apersorneqarluni taama oqarpoq.
Bryndís Haraldsdóttirip taama oqaaseqarnera Tórshavnimi aamma maluginiarneqarpoq Savalimmiunilu tusagassiuutini annerni issuarneqarluni.
Nunat Avannarliit Siunnersuisoqatigiivisa inatsisartuini qinikkat siulittaasuat, Savalimmiuni ukiumoortumik nalliuttorsiutigineqartartumut Ólavsøkamut atatillugu qanittukkut tikeraarpoq. Bryndís Haraldsdóttir Savalimmiuni inatsisartunut pulaarpoq, tassani lagmandi Aksel V. Johannesen oqalugiarnermini erseqqissaavoq Savalimmiut Nunat Avannarliit Siunnersuisoqatigiivinut tamakkiisumik ilaasortanngornissartik kissaatigigaat.
Lagmandip oqaatigaa, Savalimmiuni tamanna ukiuni 50-ini utaqqineqarsimasoq, maannalu naammagittarunnaartoqarsimasoq – soorluttaaq Kalaallit Nunaanni aamma taamaattoq.
Bryndís Haraldsdóttirip Morgunbladid-imi apersorneqarnermini Aksel V. Johannesenip oqalugiaataa ima oqaatigaa:
- Savalimmiut tamakkiisumik ilaasortaatitaassanngikkunik „sakkortuumik iliuuseqarnissaminnut” piareersimapput.
A-mut aamma B-mut immikkoortitsineq
Nunat Avannarliit Siunnersuisoqatigiivini ajornartorsiorneq annerulerpoq, Naalakkersuisut siulittaasuat, Nunat Avannarliit Ministeriisa Siunnersuisoqatigiivisa ataatsimiinneri peqataaffigiumanagit maajip aallartinnerani aalajangermat. Múte B. Egedep kamaatigigamiuk nunat avannarliit ministeriunerisa Stockholmimi aasaanerani pisortatigoortuunngitsumik ataatsimiinneranni qaaqqusaannginnini. Aammami nunat namminersorlutik oqartussaqarfiusut allat, Savalimmiut Ålandilu aamma qaaqqusaanngillat.
Mútep oqaatigaa, „a-nut b-nullu immikkoortitsineq akuerineqarsinnaanngilluinnartoq aalajangiusimaneqarsinnaananilu“.
- Naalakkersuisut siulittaasuattut taama iliuuseqartariaqarnera ajuusaarnarpoq, suleqatigiinnerli ataqqeqatigiinnermik naligiinnermillu tunngaveqartariaqarpoq. Tamanna Kalaallit Nunaata ersarissumik oqaatigaa, Kalaallit Nunaatalu paasiuminaatsippaa siornatigut arlaleriarluni peqataatitsinnginnerit ataqqeqatigiinnermik tunngaveqanngimmata, Naalakkersuisut siulittaasuat allakkani ammasuni allappoq.
Oqariartuutaa Danmarkimit paasisinnaalluarneqarpoq, ministeriunerummi Mette Frederiksenip naligiinnerunissamik kissaateqarneq tapersersorpaa, tamatuma saniatigut AG-mi siusinnerusukkut allaaserineqartutut Nunatta isornartorsiuinera aamma Ålandip tapersersorpaa.
Ålandip nunani avannarlerni suleqatigiinnermut ministeriata Annika Hambruddip Altinget.dk-mut oqaatigaa, Sverigep siulittaasuutitaqarnermini ministeriunerit ataatsimiinnerannut Kalaallit Nunaat, Savalimmiut Ålandilu qaaqqusimanngimmagit „ajorluinnartoq“.
