Nunatsinni biilinik misissuisarneq atuutilersinneqassasoq
Biilinik misissuisarnerup atuutilerseqqinneqarnissaa siunertaralugu Færdselsstyrelsi Nuummi Sisimiunilu biilinik misissuivoq.
Angallannermut aqutsisoqarfimmi sulisut politiillu Nuummi aqqusinermi angallannermik nakkutilliisut.
Assi: Namminersorlutik Oqartussat
Biilinik misissuineq kingulleq 1999-imi pereersorlu, Kalaallit Nunaanni biilinik misissuisoqaqqittalernissaa sulissutigineqarpoq.
Biilinik misissuisarnerup atuutilerseqqinneqarnissaanik suliniummut atatillugu Færdselsstyrelsen (Angallannermut Aqutsisoqarfik, aaqq.) biilinik misissuiartorluni tikeraaqqammerpoq.
Færdselsstyrelsi juunip 24-ani Nuummiippoq juunillu 25-ani 26-anilu Sisimiuniilluni. Tassani biilinik immikkut ilisimasallit Kalaallit Nunaanni Politiit peqatigalugit biilinik assigiinngitsunik misissuipput.
Namminersorlutik Oqartussat tusagassiuutinut nalunaarummi allapput.
Biilit qanoq issusaannik misissuisinermi politiit aqqusinikkut angallattunut aalateralutik aqquserngup sinaanut unitsitsisaqattaarput. Ajoqutillu nalinginnaanerusut tassaapput qulliit ajoquteqarnerat, saavani igalaat ajoquteqarnerat, assakaasut nungullarsimanerat, singarnerillu inngigissut.
- Transportministeri Thomas Danielsen isumaqatigiissusiorfigaara, aqquserngup sinaanut unitsitsisarnikkut biilinik misissuisarneq atulersinneqassasoq. Qamutit assakaasullit isumannaatsuunissaat qulakkeersinnaaniassagatsigu, naammagisimaarnangaartumik kiisami suliaq ingerlariaqqippoq, ineqarnermut, attaveqaatersuutinut, isorliunerusunullu naalakkersuisoq Aqqaluaq B. Egede suliaq pillugu oqarpoq.
Færdselsstyrelsenimit biilinik misissuinermi suut pingaarnertut ilanngunneqartassanersut maanna nalilersorneqaleruttorput. Naliliinerit tunngavigalugit biilinik aqquserngup sinaanut unitsitsinermi misissuisinnaanermut tunngavigineqartussanik malittarisassiortoqassaaq.
