Nunatsinni imigassartorsimatilluni pinerluttarneq: Aajap Justitsministeri piumasaqarfigaa
Kalaallit Nunaanni Politiit suliarisartagaasa affai imigassamik aalakoornartortarnermut tunngasuusutut isikkoqarpoq. Kisianni tamanna pillugu pisortatigoortumik nalunaarsugaanngilaq. Maanna Folketingimi ilaasortaq Aaja Chemnitz (IA) Justitsministerimut piumasaqarpoq paasissutissanik eqqortunik saqqummiussisoqassasoq.
Folketingimi ilaasortaq Aaja Chemnitz (IA) Justitsministeri Peter Hummelgaardimut apeqqutinik arlalinnik tunniussivoq . Paasissutissat eqqortut piumavai aammalu paaserusuppaa aalakoornartumik imigassartornermut atatillugu pinerluttarnermut Justitsministeri akiuiniarluni Kalaallit Nunaanni suliniuteqarnersoq suliniuteqalikkersaarnersorlu.
Assiliisoq: Leiff Josefsen
AAJAP JUSTITSMINISTER PETER HUMMELGAARDIMUT APEQQUTAI
Politiit ukiumoortumik naatsorsuutaanni takuneqarsinnaavoq, inoqatinik navianartorsiortitsilluni pinerluttarnerit pinerlunnerit tamarmik affaasa missaannik annertussuseqartut, tamannalu annertuumik ajornartorsiortitsivoq.
Misissuinerit arlallit ersersippaat, imigassamik aalakoornartumik atuineq navianartorsiortitsillunilu pinerluttarneq imminnut attuumasorujussuusut. Tassunga atatillugu Ministeri:
a) nassuiaateqassava Kalaallit Nunaanni imigassamik aalakoornartumik atuisarneq inunnillu navianartorsiortitsilluni pinerluttarneq imminnut qanoq attuumassuteqarnersut?
b) kisitsisinngorlugu saqqummiusserusuppa qanoq annertutigisumik Kalaallit Nunaanni inunnik navianartorsiortitsisumik pinerluttoqartarnersoq ersersillugu?
c) paasissutisseerusuppa, nammineq naliliinini naapertorlugu Kalaallit Nunaanni pinerluttoqartarneranut annertoorujussuarmut imigassaq aalakoornartoq annertuumik pissutaaqataasoq?
d) paasissutissiissavaa, suut suliniutit aallartinneqarsimanersut imigassamik aalakoornartumik atuineq aallaavigalugu Kalalallit Nunaanni pinerluttoqartarnerata akiuiniarnermut?
Justitsministeriap ilisimatusarnermut Immikkoortortaqarfia, pinerluttoqartarneranik pinaveersaartitsinermillu ilisimatuussutsikkut misissuisartoq, Danmarkimi imigassamut attuumassutilimmik pinerluttoqartarneranik misissuinermi nalunaarusiornermilu siuarsimalluarpoq.
Ulluni makkunani Nunatsinni imigassamut politikki nutaaq pillugu politikerinit ilisimatusartunillu ilusilersorneqaleruttorpoq. Aaja Chemnitz (IA) isumaqarpoq nutaamik imigassaq pillugu politikkimik ilusilersuisoqarneranut atatillugu aamma inuit akornanni oqallinneq pisariaqartoq.
Paqumisuutigiinnarlugu oqaluuserinaveersaarneqarunnaartariaqarpoq
- Nunatsinni imigassamik aalakoornartortalimmik atuinerup pinerluttarnerullu imminnut atalluinnarnerat ilisimavarput. Tassunga tunngatillugu inunnik navianartorsiortitsilluni pilerluttarnerit amerlasoorujussuupput, tassani ilaatigut pivakka persuttaaneq, pinngitsaaliisarneq, meeqqanik kinguaassiutitigut atornerluisarnerit, tamakkulu ullumikkumut sanilliullugu annertunerusumik akiorniartariaqarnerarigut isumaqarpunga, tamannalu iluatsittumik ingerlanneqarsinnaassappat oqallinnermik aallartitsinissatsinnut sapiissuseqartariaqarpugut. Imigassamik aalakoornartumik atueriaaserput kingunerisartagaalu pillugu paqumisuutiginniinnarluta oqaluuserinninnaveersaarnerput qaangerniartariaqarparput, Aaja Chemnitz oqarpoq.
Imigassamik aalakoornartumik atueriaaserput kingunerisartagaalu pillugu paqumisunneq piinnarlugu oqaluuserinninnaveersaarnerput qaangertariaqarparput
– Aaja Chemnitz
Oqallinneq pissutsinik piviusunik aallaavilimmik ingerlanneqarsinnaaniassammat Aaja Chemnitzip apeqqutit arlallit Justitsministerimut saqqummiuppai, taannami Kalaallit Nunaanni Politiit Eqqartuusiviullu qullersaraat.
Tusarfik: Kalaallit Nunaanni Politiit ukiumoortumik nalunaarutaat 2023
Apeqqutiminut ilanngullugu apeqqutigaa aalakoornartumik imigassartornermut atatillugu pinerlunniartarnerit pinaveersimatinniarlugit iliuusissanik pilersitsisoqarsimanersoq pilersitsisoqassamaarnersorluunniit.
Danmarkimut ikioqqunerua Nunatsinni imigassamik aalakoornartutortariaaserput iliuuseqarfigeqqullugu?
- Taamatut apeqquteqarninni, qiterpiaa tassaavoq, uagut nammineq iliuuseqarsinnaanissatsinnik ujartuineruvoq, taamaattorli oqallinneq kimeqarluartumik kinguneqarluartumillu ingerlassinnaassagutsigu, isumaqarpunga pingaaruteqartoq pissutsit piviusut qanoq ittuunerinik takussutissanik pisariaqartitsisugut, tassami Nunatta taartortaa Politiit Justitsministeriallu ilisimasaqarfiginerpaavaat.
Matumani ujartorpigit paasissutissat imigassamik aalakoornartumik attuumassuteqartumik pinerluttuliortarnerit Kalaallit Nunaanni Politiit ukiumoortumik nalunaarusiaanni ersarinnerusariaqartut?
- Politiit tassaapput inatsisit tunngavigalugit inuiaqatigiittut aaqqissuussanitsinni ilaasut, uagullu qulakkeerinninniaqataasinnaavugut, taakku sulinerminni pitsaanerpaamik atugassaqartitaanissaat. Ukiuni arlalinni meeqqanik kinguaassiutitigut atornerluisarnerit akiorniarsimavakka, aamma Folketingimi aningaasaliissutitigut qulakkeerinneqataasimallunga, taassungalu aningaasaliissutit atorneqarsimalereerput, taamaattoq suli isumaqarpunga pingaaruteqarluinnartoq ajornartorsiutip sorlaqarfia oqallisigisariaqaleripput. Tassungalu atatillugu imigassaq aalakoornartoq pineqaraangat, silaqassuseq naliliisinnaassuserlu atuutaarussinnaasarput, taavalu pinerluttuliornerit pisarput, tamannalu tamatta kissaatigigunanngikkaluarparput.
