Nunatsinni inatsisilerituutut ilinniagaqarneq inatsisinik atortitsinermut ministereqarfiup akuerigaa

Ilisimatusarfimmi inatsisilerinermi kandidatitut ilinniagaqarsimasut, siunissami Naalagaaffeqatigiinni kandidatitut ilinniagaqarsimasut assigalugit, Naalagaaffeqatigiinni inatsisilerituutut atorfinnut qinnuteqarsinnaalissapput.

Assersuutigalugu inatsisilerituut Danmarkimi ilinniagaqarsimasut kisimik maannamut Nunatsinni eqqartuussisutut, inatsisilerituutut imaluunniit unnerluussisussaatitaasutut atorfinitsinneqarsinnaasarsimapput. Tamannali equngassut maanna iluarsineqarpoq. Tamannalu inatsisilerituutut ilinniarnermut, bacheloritut ilinniarnermik 2018-imi aallartitsisimasumut, septembarimilu 2024-mi annertusillugu Nuummi kandidatitut ilinniarnermik aallartitsisimasumut, alloriarneruvoq.

Pingaaruteqarluinnartoq

Ilisimatusarfimmi kandidatinngorniat siulliit 2026-mi aasakkut naammassinissaat naatsorsuutigineqarpoq.

Taakkua ilagaat 28-nik ukiulik Ida-Marie Rasmussen, inatsisilerinermut bacheloriusoq 2024-milu kandidatinngorniarluni aallartittoq. Ilinniarnermi saniatigut Nuna Law-imi inatsisilerinermut siunnersortitut sulivoq.

Inatsisinik atortitsinermut ministereqarfiup Ilisimatusarfimmi inatsisilerinermi kandidatinngorniarluni ilinniagaq, Danmarkimi ilinniarnermut naligitilermagu, Ida-Marie Rasmussenimut pingaaruteqarluinnarpoq.

– Tassa imaappoq, Nunatsinni inatsisilerituutut ilinniakkakka atorlugit inatsisilerituutut ilinniagaqarsinnaanngorpunga, oqarpoq nangillunilu oqaatigalugu inatsisilerituutut ilinniartitaaneq ataatsimut isigalugu Nunatsinnut iluaqutaasimasoq.

– Nunatsinni inatsisilerinermik ilinniarfeqalernerput iluartorujussuuvoq, taamaalillutami inatsisilerituutut ilinniagaqarniarutta Danmarkiliartariaqarunnaaratta. Ilaquttanut qanimut attaveqartoqarsinnaalerpoq, tamatumalu saniatigut inatsisilerituunngorniartut ilinniakkaminnik ingerlatsinerminni inuiaqatigiit kalaallit aallaaviginerusinnaassavaat.

Inatsisilerinermi kalaallisut oqaatsit

Ilisimatusarfimmi immikkoortortaqarfimmi pisortap Anette Storgaardip Ilisimatusarfimmi inatsisilerinermik ilinniarfimmik pilersitsinissaq ukiuni arlalinni ilungersuutigisimavaa, inatsisilerinermik ilinniarfimmik bacheloritut kandidatitullu ilinniagalinnik Ilisimatusarfimmi ilinniarsimasunik peqalernissaq siunertaralugu. Tamatuma saniatigut kalaallisut inatsisilerinermi oqaatsit pitsaanerusumik ineriartortinneqarnissaannut peqataasinnaassammata, tassami qallunaat inatsisilerinermik suliaannit siornatigut sunnerneqarsimaqimmata.

– Kalaallit Nunaanni maanna inissisimalluarpugut, maannalu Inatsisinik atortitsinermut ministereqarfimmit kandidatinngorniarluni ilinniartitsisarnerput akuerineqarmat, ilinniartuutivummi Naalagaaffeqatigiinni nunani allani kandidatitut suliffissarsiorsinnaalerput.

– Kalaallit Nunaanni inatsisilerinermut alloriarnerujussuuvoq. Maani kandidatinngorsimasut ph.d.-nngorniarlutik Ilisimatusarfimmi ilinnialernissaat siunertaavoq, taamaalillutalu inatsisilerinermut immikkoortortaqarfimmi ilisimatusarnikkut tunngavilimmik ilinniartitsisalersinnaaniassagatta.

Ilimmarfimmi inatsisilerinermik ilinniarfimmut attuumassutillit maanna 50-it missaanniipput.

Ilinniarneq pillugu sammisaq iserfissaq aqqutigalugu akeqanngitsumik atuaruk UANI