Nunatsinni upernaaq manna arfinileriarluni kiassiutikkut rekordiliisoqartoq
Sermersuup qaani upernaaq 2016-imi aatsaat taama kiatsiginermit 1,6 gradinik kiannerusimasoq DMI-p paasissutissiissutigaa.
Upernaaq manna Nuummi apriilip arfineq-pingajuani anorersuarnerani 16,9 gradinik kiassimammat silami kiassiornikkut rekordiliinerit ilagaat.
Toqqorsivimmiit assi: Leiff Josefsen
Sermersuarmi upernaaq siornatigornit sanilliullugu kiannerujussuusimavoq.
- Upernaaq manna agguaqatigiissillugu -24,8 gradinik issippoq, taamaalillunilu aatsaat taama issikitsigaaq, DMI nittartakkamini allappoq.
DMI naapertorlugu Kalaallit Nunaanni sumiiffiit issinnersaanni qaammatini kingullerni pingasuni kiassuseq qaffasisorujussuusimasoq uuttortaanerit takutippaat.
Aamma Ittoqqortoormiini kiassimavoq, maajimi aatsaat taama kiatsigisimalluni aammalu maajimi aatsaat taama kiatsigisimalluni.
DMI naapertorlugu Tunumi kiassutsip aatsaat taama qaffasitsiginera pingaartumik maajimi kiassuup nalaani Atlantikup avannaani silaannaap nikerannginneranik pissuteqarpoq.
Nuummi aamma aatsaat taama kiatsigisoq
Nuummi apriilip arfineq-pingajuani upernaakkut kiannerani 16,9 gradinik kiassuseqarluni aamma rekordiliisoqarpoq.
Maajimi kiannerpaaffia World Weather Attribution-imit (WWA, silasiorfimmit, aaqq.) misissorneqarsimasoq DMI-p aamma ilisimatitsissutigaa. Silasiorfik silap pissusiata inunniit pilersinneqartumik allanngoriartornerata silarlorujussuartarneranut qanoq sunniuteqartigisarneranik misissuinermik suliaqarpoq:
- Kiannerpaaffia silap inuit pilersitaanik allanngoriartornera pissutigalugu 3 ºC-mik kiannerusimasoq silasiorfiup naatsorsorsimavaa, DMI oqaluttuarpoq.
Kalaallit Nunaanni kiassiutikkut 2025-mi upernaakkut katillugu arfinileriarluni rekortiliisoqartoq DMI allappoq:
- Summit Station: apriilimi aatsaat taama kiatsigisoq (–24,4 ºC, 1991-imiit 2020-mut nalinginnaasumit 6,8 ºC-nik kiannerulluni)
- Summit Station: upernaami aatsaat taama kiatsigisoq (–24,8 ºC, 1991-imiit 2020-mut nalinginnaasumit 5,9 ºC-nik kiannerulluni)
- Ittoqqortoormiit: maajimi aatsaat taama kiatsigisoq (–0,2 ºC, 1991-imiit 2020-mut nalinginnaasumit 1,9 ºC-mik kiannerulluni)
- Ittoqqortoormiit: maajimi aatsaat taama kiatsigisoq (14,3 ºC maajip 19-iani, 1987-imi kiannerpaaffiusimasumit 0,7 ºC-mik kiannerulluni)
- Daneborg: maajimi kiassutsip qaffasinnerpaaffia (12,3 ºC maajip 18-iani, 1973-imi kiannerpaaffiusimasumit 1,3 ºC-nik kiannerulluni)
- Nuuk: apriilimi kiassutsip qaffasinnerpaaffia (apriilip 8-ani 16,9 ºC, siornatigut 2019-imi kiannerpaaffiusumit 2,3 ºC-nik kiannerulluni)
