Nunatta Eqqartuussisuuneqarfiata aalajangerneq attakkaa — Watson suli tigummigallarneqassaaq
Paul Watsonip pinerlunneq peqataaffigisaa sakkortuutut nalileqarsinnaanngimmat aamma qaartartup tippassaatip qaartinneqarnissaa ilisimasimanngimmagu iperagaanissaa illersuisuisa piumasaraat. Paul Watsonip pisuussuteqannginnera uppernarsarniarlugu assit uppernarsaatit illersuisut eqqartuussinermi saqqummiuppaat. Taamaakkaluartoq Nunatta Eqqartuussisuuneqarfiata aalajangerneq attatiinnarpaa.
Paul Watsonip Kalaallit Nunaanni tigummigallarneqarnera tusagassiuutitigut suli sammineqangaatsiarpoq.
Foto: Leiff Josefsen
WATSONIMUT TUNNGATILLUGU EQQARTUUSSINERIT
Juulip
21-at, 2024: Paul Watson Nuummi tigusarineqarpoq, aggustillu 15-iata
tungaanut tigummigallarneqarluni. Nunatta Eqqartuussisuuneqarfianut
suliassanngortitsivoq.
Juulip
23-at, 2024: Nunatta Eqqartuussisuuneqarfiata eqqartuussiviup
aalajangernera atuuttussanngortippaa.
Aggustip
15-iat, 2024: Kalaallit Nunaanni Eqqartuussivik aalajangerpoq Paul
Watson septembarip tallimaata tungaanut tigummigallarneqassasoq.
Nunatta Eqqartuussisuuneqarfianut suliareqqitassanngortippaa.
Septembarip
sisamaat, 2024: Kalaallit Nunaanni Eqqartuussivik aalajangerpoq Paul
Watson oktobarip aappaata tungaanut tigummigallarneqassasoq. Nunatta
Eqqartuussisuuneqarfianut suliareqqitassanngortippaa.
Oktobarip
aappaat, 2024: Kalaallit Nunaanni Eqqartuussivik aalajangerpoq Paul
Watson oktobarip 23-ata tungaanut tigummigallarneqassasoq. Paul
Watsonip aalajangiineq Nunatta Eqqartuussivianut
suliareqqitassanngortippaa. Ulloq taannarpiaq eqqartuussiviit
pingajuannut suliassanngortitsinissamut akuerineqarpoq, suliarlu
Eqqartuussiviit Qullersaannut ingerlateqqinneqassaaq.
Oktobarip 14-iat, 2024: Nunatta Eqqartuussisuuneqarfiata Kalaalit Nunaanni Eqqartuussiviup aalajangernera atuuttussanngortippaa.
Nunatta
Eqqartuussisuuneqarfia ataasinngornerup ullaavani inunnik
ulikkaarpoq. Avatangiisinik illersuiniap Paul Watsonip, Nuummi juulip
naalerneranili tigumigallarneqartup, eqqartuussisuuneqarfimmut
suliareqqitassanngortitsinera najuuttut malinnaaffigaat.
Sermitsiaq suliamik
nunanit tamalaanit maluginiarneqarluartumik malinnaassalluni aamma
najuuppoq. Suliaq Paul Watsonip Japanimut tunniunneqarnissaanut
tunngavoq, ukiut arlallit tamatuma siorna pisimasumut tunngatillugu
nunanit tamalaanit tigusarineqarnissaanik peqqussuteqartoqarnera
pissutigalugu.
Avatangiisinik
illersuiniap Paul Watsonip, Nuummi 2024-mi juulip 21-anili
tigummigallarneqartup, illersuisua inatsisileritooq Jonas
Christoffersen iperagaanissaanik piumasaqarpoq.
Ajortuliornerup sakkortussussaa apeqquserneqartoq
Illersuisut takussutissat pingasut eqqartuussinermi takutissagaat
eqqartuussisup eqqartuussinissaq sioqqullugu akueraa. Unnerluussisup
sakkortuumik akerlileqqagaluaraa tamanna pivoq.
Japanimiut arfanniat saassunneqarneranni unnerluussisumit qanoq
sakkortigineqarnera apeqquserneqarsinnaasoq illersuisup Jonas
Christoffersenip, Danmarkimi Inuit Pisinnaatitaaffii pillugit
Ilisimatusarfimmi pisortaasimasup, tikkuarpaa.
- Peter Pertunip qaartartumik tippassaamik atuineranut Paul Watsonip
akisussaaqataasimanera pillugu apeqqummut tunngavissaqarluartumik
pasilliuteqarneq eqqartuussivimmi nalinginnaasumik, mani pinnani,
nalilerneqassaaq. Watsonimi qaartartumik tippassaammik
qaartitsisoqarnissaanik ilisimatinneqarsimanngilaq. Bethunep kisimi
aalajangerpaa qaartartumik tippassaammik qaartitsinissaq, illersuisoq
Jonas Christoffersen eqqartuussinermi oqarpoq, tikkuarlugulu Paul
Watson saassussinermut peqataasutut unnerluutigineqassanngitsoq.
Ajoqusiineq
annertunngitsoq
Qaartartup
tippassaatip sumut iginneqarsimerani assimi takuneqarsinnaavoq,
tassani inuusuttup ajoqusernera ersilluni. Taassuma qanoq
annikitsigisumik ajoqusersimanera uppernarsarniarlugu
nakorsiaaneranit allagartaq illersuisut atortarpaat.
Illersuisup
assinik nassuiaanerani unnerluussisup Mariam Khalilip arlaleriarluni
unitsillugu eqqaasitsissutigaa assimi suut takuneqarsinnaanersut
eqqartuussisup nammineq nalilissagaa.
Eqqartuussinermi
tamatumani illersuisut Paul Watsonip pinngitsuutinneqanissaa
anguniarpaat.
Iperagaasariaqartoq
Watson
Japanimiunut arfannianut qaartartumik tippassaammik
qaartitseqataasimasutut, inummik ataatsimik ajoqusertoqarneranik
kingunilimmik, unnerluutigineqarpoq.
Qaartartut
tippassaatit annertuumik ajoqusiisinnaanngitsut illersuisut
tikkuarpaat.
-
Qaartartumik tippassaammik igitsineq qanoq ulorianartigaa?
Ajoquserneq kisiat eqqarsaatigigaanni, eqqorneqartoq
akornuserneqarpoq kiinnamigullu qaanneqarluni. Ajoquserneri aqaguani
tammangajareersimapput, illersuisoq oqarpoq.
Taamaattumik
illersuisut isumaqarput unnerluussut ingasattajaarnertut
oqaatigineqarsinnaanngitsoq, nakuusernermulli sakkukitsumut
tunngatillugu taamaallaat unnerluutigineqarsinnaasoq. Watson
qaammatini arlalinni pinerluuteqarsimasunut inissiisarfiimi
tigummigallarneqarsimammat Paul Watson iperagaassasoq illersuisut
piumasaraat.
Pasitsaassinissamut
tunngavissaqartoq
Unnerluussisussaatitaasup
Mariam Khalilip tamanna isumaqataaffiginngilaa. Umiarsuaq arlalinnik
tippassaatinik qaartartumeerneqarsimasoq, Peter Bethunellu Japanimi
ukiuni marlunni pineqaatissinneqarsimanera pinerluuteqaqqissagunilu
ukiuni tallimani
paarnaarussassanngortinneqaqqissinnaaneranik uppernarsaatit saqqummiuppai.
Unnerluussisussaatitaasup
taamaalilluni Paul Watsonip inatsisinik unioqqutitsisimaneranik
pasitsaassinissamut tunngavissaqartoq erseqqissarpaa. Qaartartut
butanimik akullit pineqartut, taakkulu inunnik eqquippata
eqquinngippataluunniit sakkututu ulorianartutut isigineqartariaqartut
aamma erseqqissarpaa.
-
Pisup sakkortussusaa eqqarsaatigalugu, unnerluussisut
oqaatigiuarsimasaattut, umiarsuup aappaani inuttaqartoq
nalunngikkaluarlugu qaartartunik tippassaatinik
miloriussuisoqarsimavoq. Naak nalunagu inunnik ajoqusiisoqarsinnaasoq
taamaaliorneq imaani saassussineruvoq, unnerluussisoq Mariam Khalil
oqarpoq.
Nunatta Eqqartuussisuuneqarfiata tigummigallarneqarnera attatiinnarpaa
Nalunaaquttap akunnerini arlalinni uppernarsaatit eqqartuussisullu suliamik ingerlatsinerisa kingorna Nunatta Eqqartuussisuuneqarfia aalajangerpoq eqqartuussiviup aalajangernera, tassa Paul Watsonip tigummigallarneqarnerata oktobarip 23-ata tungaanut sivitsornissaa, attatiinnarneqassasoq.
Japanimiut umiarsuaannut saassussineq pinerlunnerup qanoq ilungersunartigineranut takussutissaasoq, tassami tamanna imaani pimmat, suliami tamatumani unnerluussisussaatitaasup tikkuarnikuuaa.
