Nunatta kujataani nioqqutissanik pilersuinermi ajornartorsiortoqarpoq
- Ukioq mannaasit nunatta kujataani sikorsuit puulukertitsisaarmata sumiiffinni mikinerusuni KNI-p
pilersuiniarnermini assut ajornartorsiuteqarfigaa, taama KNI paasissutissiivoq. Nunatsinni sumiiffippassuarnut pilersuinermi KNI-p
tikiussiniartarnini ajornartorsiutigisarpaa, ukioq mannali nunatta kujataani aatsaat taamak sivisutigisumik
pilersuisinnaasimannginnera nalinginnaasuunngilaq. Taamaattoqarnerani KNI-p nioqqutissanik
pilersuinermini allatut tikiussuisariaqarsimavoq.
Storis i Sydgrønland.
KNI Nunatta Kujataanut nioqqutissanik assartuiniarluni ilungersorpoq, inoqarfinnullu minnernut assartuinissaminut aqqutissanik allanik nassaarniartariaqarsimalluni, taama KNI tusagassiuutitigut nalunaarummini allappoq:
- Ukioq mannaasit nunatta kujataani sikorsuit puulukertitsisaarmata sumiiffinni mikinerusuni KNI-p pilersuiniarnermini assut ajornartorsiuteqarfigaa.
KNI apriilimi maajimilu Aappilattumut nioqqutissanik apuussinissaminut aalisariummik attartortariaqarsimavoq, nunattalu kujataani sumiiffinnut mikinerusunut pajunnissamut umiatsiaaqqanik mikinerusunik assartuititsinissamut attartortariaqarsimalluni.
Nassiussat 20-30 kiilut
KNI paasissutissiivoq pilersuiuartoqarnissaa qulakkeerniarlugu nassiussat qulimiguullip nassarsinnaasai killeqaraluaqisut naatitaanerusunik inerittuunerusunillu sapaatip akunneranut 20-30 kg nassiussisoqartarsimavoq.
- Timmisartuussisinnaanermik periarfissat killeqarmata nioqqutissanik amerlanerusunik assartuinissamut qulimiguulimmik attartorsinnaasimanngilagut.
Ukioq manna Aappilattumut pilersuiniarnerup assut ajornartorsiorfiunerani nioqqutissanik pilersuiniermi KNI assut suliniuteqarsimasoq, Pilersuisumi pisortap Brian Weuge Chemnitzip oqaatigaa:
- Nalinginnaasumik umiarsuup pajulluni Aappilattumut kiisami tikissinnaanngornera assut nuannaarutigaarput, neriuppugullu pisisartutta nioqqutinik aalajaannerusumik pilersorneqarnissaannut sikorsuit ajornartorsiortitsivallaarunnaassasut.
Umiarsuup tullissaanik Aappilattumut pajoqqinnissaa 11. juulimut ullulerneqarnikuuvoq.
