KL

DK

Nunatta tikeraarneqarnera: Oqaatsit eqqunngitsut isigineqarnitsinnut innarliisinnaapput

Donald Trump Jr.-ip Nuummut tikeraarnera nunatsinnut ukkatarinnilersitsivoq. Tikeraarneqarneq nunatsinnut tikeraarusulersitsisinnaavoq, paasissutissalli eqqunngitsut siammarterneqarneratigut Kalaallit Nunaata isiginiarneqarnernut innaliisinnaammat Visit Greenlandip mianersoqqussutigaa.

- Tikeraarneq nunarsuarmiunut Kalaallit Nunaannik soqutiginninnerulersitsivoq tusagassiuutitigullu maluginiarneqarnerulerluni, Visit Greenlandimi pisortaq oqarpoq.
Tôrtia Reimer-Johansen
Journalist
Offentliggjort

Kalaallit Nunaat maanna nunarsuaq tamakkerlugu isigineqarpoq.

- Tikeraarneq nunarsuarmiunut Kalaallit Nunaannik soqutiginninnerulersitsivoq tusagassiuutitigullu maluginiarneqarnerulerluni. Nunatta eqqaaneqarnera takornariarfissatut soqutigineqarnerulersitsisinnaavoq, uagulli sulinitsinni pingaaruteqarluinnarpoq nunarsuarmiut Kalaallit Nunaat pillugu isiginnittaasiat piviusunut nunamilu misigisanut naapertuuttariaqartoq, Anne Nivíka Grødem, Visit Greenlandimi pisortaq oqarpoq.

Kisianni...

- Ajoraluartumik maluginiarpara qanittukkut tikeraarneq kukkusumik oqaaseqarnermik kinguneqartoq, Kalaallit Nunaat pillugu eqqunngitsumik takutitsisumik. Tamanna takornariartitsinermut inuiaqatigiinnullu ajortumik sunniuteqarsinnaavoq.

- Nunatsinnut sivikitsuaqqamik tikeraarnerani killilimmillu peqataanerata kingorna saqqummiunneqartut eqqunngitsut Kalaallit Nunaat pillugu takutitsisutut isumaqarfiginngilakka, Grødem itisiliivoq.

- Piffissap takutikkumaarpaa

Trump Jr.-ip tikeraarneraniilli Visit Greenlandip maluginiarpaa tusagassiuutitigut sammineqarnerulerneq nittartakkakkullu alakkarneqarnerulersimanertik.

- Taamatulli soqutiginninnerup siunissaq ungasinnerusoq eqqarsaatigalugu takornariaqarnerup malunnaatilimmik amerlinera kingunerisinnaavaa, tamannali suli nalileruminaappoq, Anne Nivíka Grødem Sermitsiamut oqarpoq.

Maluginiarneqarnerulernermut pilersaarut

Naak piffissap takutikkumaaraa Visit Greenlandip pisortaa oqarpoq soqutiginninneq annertusiartortoq qanoq iliuuseqarfiginiarlugu, piujuartitsineq eqqorluartumillu attaveqatigiinneq pingaartillugit pilersaarusiorniarlutik.

- Maannakkut Kalaallit Nunaat pillugu tunngaviusunik ilisimasat, paasissutissat iluaqutaasut nittartakkatsinni saqqummiunniarpavut, nittartakkatsinnik alakkarterpassuit nuna pillugu assigiinngitsorpassuarnik paasisaqarsinnaaniassammata.

- Kalaallit kinaassusiat innarlerneqannginniassammat ineriartorneq malinnaaffigilluartarparput naliliiuaannarlutalu takornariartitsinerup ineriartortinnissaanut akisussaassuseqarluni qanoq iliuuseqartoqarsinnaanersoq, Visit Greenland nassuiaavoq.

inuiaqatigiit samfund

ATORFIIT Se alle jobs

Powered by Labrador CMS