Nutaanik ilikkagaqarnissamut kingusinaanngisaannarpoq

Ane Joelsen Siegstad (40) Aasianniit Danmarkimut oktobarip 20-ani aallassaaq. Tassanngaanniit Korea kujallermi illoqarfissuarmut Seoulimut angalassaaq, upernaakkullu 2026-mi oqaatsinik ilinniarfimmi atuassalluni kiisalu ilaqutariinni koreamiuni najugaqassalluni. 

– Ukiup affaa qaangiuttoq aalajangerpunga nunarsuaq misigisassarsiorfissagukku massakkuusariaqartoq. Aappaagumut utaqqissaguma immaqa kingusinaassaanga, Ane Joelsen Siegstad oqarpoq, taassuma Seoul aasaq manna tikeqqaassavaa, anaananilu angalaqatigiumasimallugu.

– Seoulimut 2025-mi aasakkut angalaqatigiissalluta decembarimi aalajangerpugut. Anaanama koreamiut isiginnaagassiaat nuannarilluinnartarpai, taamaattumillu angalaqatigiumavaanga. Koreamiusut oqaatsinik ilinniarlunga aallartippunga, taamaalillungalu EF-ip oqaatsinik ilinniarluni nunani allani najugaqartitsinnissamut periarfissaqartitsinera aamma piaarinaatsoornerinnarmi paasivara, taassuma kingorna pikkorissarnermut tassunga peqataanissamut isumaqalernera annertusiartuinnavissimavoq. 

– Koreami kujallermi inooriaatsip qanoq ittuunera aamma soqutigilerpara, nunallu japanimiunit 1905-45 akornanni tiguaqqaneqareernermi kingorna qanoq ineriartorsimanera aamma paasisaqarfigerusulerlugu. Inunnut akulerusimaninni kulturikkullu ilikkaqarfigisinnaallugu misigisimavunga. Koreamiut tikilluaqqusilluartuupput inussiarnersuullutillu. Nunaallu kusanarluinnarpoq. 

EF-mit aallartitaq 

Education First (EF) nunani tamalaani ilinniartitaanermik suliniaqatigiiffiuvoq oqaatsinik ilinniartitsinermik, oqaatsinut tunngasunik angalatitsisarnermik kulturinillu ineriartortitsinissamik pingaartitsisunik nunat tamalaat akornanni ilinniartitaanermik immikkut neqerooruteqartartoq. Namminersortumit pigineqarpoq, peqataanissarlu taamaattumik aningaasartuuteqarfiusussaalluni.

– Ukiup affaani pikkorissarnermut najugaqarnermullu aningaasartuuteqarfiungaatsiassaaq. Aningaasaliisarfinnut assigiinngitsunut qinnuteqartarsimavunga, ajoraluartumilli oqaatsitigut ilinniarfik pineqarmat tapiissuteqarnissaq ajornaatsuinnaanngilaq. EF-illi aperisimavaanga Kalaallit Nunaanni peqatigiiffimminnit aallartitatut atuuffeqarusunnersunga, akuersivungalu, taamaattumillu inuit attaveqaqatigiittarfiini qupperniliorpunga misigisakka oqaluttuarisassallugit. Tamanna uannut aningaasarsiutaanngilaq, kisianni pointinik pissarsisarpunga Korea Kujallermi sammisassanut angalanernullu assigiinngitsunut atorneqarsinnaasunik. Nammineq ilisarisimasaqarput USA-mi EF-ip oqaatsinik ilinniarfimmut peqataasimasumik, tamannalu nuannaarutigaara, taamaalillungalu ingerlanera toqqissisimanartippara. 

Uia Aasianniiginnassasoq

EF-ip atuarfia Seoulimiittoq Gangnamimiippoq. Pisiniarfippassuarnik, neriniartarfippassuarnik cafénillu avatangerneqarsimalluni. Oqaatsinik atuartitsineq ullaakkut nalunaaqutaq arfineq-pingasut qeqqaniit ualikkut nalunaaqutaq sisamat qeqqata tungaanut, ullut tamaasa ingerlanneqartassaaq, kingornalu ilinniartunut sammisassaqartitsisoqartassalluni.

- Allamiut oqaasiinik ilinniarneq ajornannginnerulersinniarlugu ilaqutariinni najugaqarniarlunga aalajangerpunga, pissangaqaangali, Ane Joelsen Siegstad oqarpoq.

Uia, ukiuni 23-ni najorsimasaa, Aasianniiginnassaaq.

 – Oqaloqatigiingaatsiarnikuuvugut aallaqqaataaniilli aamma tapersersorpaanga. Inuuninni siullermeerlunga taama nunarsuarmi angalassaanga, isumaqarpungalu ukiup affaani avissaaqqalaarnissarput sapinngikkipput. Malugisinnaavara nutaamik misiliinissaq imminullu ilinniarnissaq uannut pingaaruteqartoq. Ilinniartitaanikkut eqqarsartaatsikkullu pissarsiassakka pissagangaakka, siunissallu qanoq ikkumaarnissaa aamma pissagangalugu.

– Nutaanik misiliinissamut kingusinaartoqanngisaannarpoq. Soorunami naviasuppunga, pingaarnerpaamilli pissangallungalu misigisassarpassuannut takusassarpassuannullu nutaanut qilanaarpunga, Ane Joelsen Siegstad oqarpoq.

Ane Joelsen Siegstad Tik Tokimi Instagramimilu SapagaqInSeoul-imik imminut taalluni qupperneqarpoq, taakkunanilu malinnaavigineqarsinnaavoq.