Nutaarsiassaqartitsiviup Kalaallit Nunaat pillugu tv-kkut ilanngutassiornera Trumpip avoqqaaraa
Nutaarsiassaqartitsiviup CBS-ip tv-kkut aallakaatitassiarisartakkamini ‘60 Minutes’-imi Ukraine aamma Kalaallit Nunaat pillugit ilanngutassiornini aallakaatitassiorsinnaajunnaartitaassutigisariaqaraluaraa, Amerikamiut præsidentiat isumaqarpoq.
Tv-kkut aallakaatitassiami ilanngutassiaq præsidentip kamaatigaa.
Assi: Nathan Howard/Reuters/Ritzau Scanpix
Amerikami
nutaarsiassaqartitsiviit ilaata ilisimaarineqartup CBS Newsip tv-kkut sapaatikkut aallakaatitassiarisartakkamini
‘60 Minutes’-imi Ukraine aamma Kalaallit Nunaat pillugit ilanngutassiornera, USA-p
præsidentiata Donald Trumpip assuarersuaarpaa.
USA nunamilu
tassani oqartussat siuttuuffigisakka nikassaarpaluttumik pututitsinerpalaartumillu
saqqummiunneqartut, USA-p præsidentia inoqatinut nammineq attaveqatigiittarfiutimini Truth
Socialimi allappoq.
CBS-mit ilanngutassiat
ilaat Ukrainemut tunngasuuvoq, Ukrainep præsidentia Volodymyr Zelenskyj USA-lu
attaveqatigiinnertik pillugu tassani apersorneqarluni.
ICC-mi
præsidentiusimasoq politikeriusimasorlu Aqqaluq Lynge ilanngutassiami Kalaallit
Nunaannut tunngasuusumi apersorneqarpoq. Taassuma Trump Kalaallit Nunaannik
suusupaginninnerarlugu isornartorsiorpaa.
– Tamanna Kalaallit
Nunaanni tamatta arajutsisimanngilarput, mamiatsaatigeqaarpullu, taanna oqarpoq.
Ilanngutassiani
assuarisamini saqqummiussat sorlerpiaat ajornartorsiutitut isiginerini, Trumpip
allatamini erseqqissaatiginngilaa. CBS-ili unioqqutitsisimasutut isigigini tamannalu
aallakaatitassiorsinnaajunnaartitaassutigisariaqaraa aalajangiusimagini,
ilanngullugu oqaatigaa. Pillarneqartariaqavittut, præsidenti erseqqissaavoq.
Trumpip CBS tassanngalu
aallakaatitassiarineqartartoq ‘60 Minutes’ aatsaat eqqartuussivilersuutigilinngilai.
Taassumami nutaarsiassaqartitsivimmi tassani tusagassiortut politikkikkut
unammillertimi Kamala Harrisip iluaqutigisaanik uukapaatitsiniaallutik
apersuisimanerarlugit taamaaliorpoq.
