NUTARTIGAQ: Angut toqungasoq blok 5-imi nassaarineqarpoq
Nuummi Politiit tallimanngornermi ullup qeqqata missaani misissuillutik aallartipput.
H. J. Rinksvejimi inissiaqarfiit ilaanni misissuinerminnut atatillugu aqusinermik matusipput.
Assiliisoq: Leiff Josefsen
Erseqqissaat: Politiinit paasissutissat nutaat tunngavigalugit allaaserisaq nutarterneqarpoq
Kalaallit Nunaanni Politiit amerlasuujullutik tallimanngornermi ullup qeqqata missaanni inissiaqarfimmi H. J. Rinksvejimi Nuup qiterpasittortaani takussaapput.
Tusagassiuutitigut nalunaarummi Politiit ilisimatitsipput, misissuineq ingerlanneqartoq inummik toqungasumik Nuummi blok 5-imi nassaartoqarnerata kingunerisaanik.
Politiinut nalunaarutiginninneq pivoq ullaap tungaani nalunaaqutaq 10:22.
- Toqungasup timaanik nassaarinniffimmi politiit najuupput misissuillutillu pasinartumik pisoqarsimasinnaaneranik, takussutissat aammalu misissuinerup killiffiani ersersitsimmata pasinartumik pisoqarsimassasoq. Misissuineq suli ingerlammat, piffissap imaalinerani Politiit paasissutissanik sukumiinerusunik tunniussisinnaanngikkallarput, Kalaallit Nunaanni Politiit tusagassiuutitigut naluunaarumminni erseqqissaapput.
Taamatuttaaq Kalaallit Nunaanni Politiit innuttaasunut tamatuma nalaani najugaqartunut kaammattuipput biileqarsimagunik videoliuutitalinnik "dash cam"-inik sumiiffimmilu biiliminnik uninngatitsisimagunik videoliat misissoqqullugit, pasitsannartunillu naammattoorsissagunik videot politiinut tunniuteqqullugit.
- Tamatuma saniatigut innuttaasut blok 5-mi taassumaluunnit eqqaani najugaqartut nakkutilliissutinik videoliuuteqarsimagunik videot pasitsannartoqarnersut misissulaaqqullugit. Kiisalu innuttaasut sapaatip akunnerata iluani blok 5-mi pasitsannartumik malussagaqarsimasinnaasut Kalaallit Nunaanni Politiit attaveqarfigineqassasut kaammattuutigineqarpoq.
