Nutartigaq: Mittarfimmi itersaq timmisartuussinermut unammillersitsivoq
Pingasunngornermi Nuummit timmisartuussinerit kinguaattoorfiupput, ullulli ingerlanerani timmisartuussinerit ingerlanneqassasut naatsorsuutigineqarpoq. Mittarfimmi nutaami itersaqarnera kinguaattoornernut pissutaavoq.
Nuummi mittarfinnut tunngasut pissutigalugit pingasunngornermi angallannermi kinguaattoorneqarpoq.
Assiliisoq: Leiff Josefsen
Malugiuk: Greenland Airportsimit paasissutissanik allaaserisaq nutartigaavoq
- Nuup nalaani mittarfinnut tunngasut peqqutigisaanik ajoraluartumik ullumikkut timmisartuussinermut pilersaarutit kinguaattuussapput, Air Greenland nittartakkamini pingasunngornermi allappoq.
Greenland Airportsimit paasissutissat sukumiinerusut tunniunneqarpata ingerlatseqatigiiffik paasissutisseeqqissaaq.
Kinguaattoornerit ullumikkut iluarsineqarsinnaanissaat naatsorsuutigineqartoq, Air Greenlandimi attaveqaqatigiinnermut pisortaq Inga Dora G. Markussen Sermitsiamut oqarpoq, Greenland Airportsili Nuummilu mittarfiit qanoq innerat apeqqutaassasoq erseqqissaatigaa.
Air Greenlandip nittartagaanut Club Timmisamullu ilaasut alapernaaqqullugit kajumissaatigaa.
Mittarfiit qanoq innerat pillugu Greenland Airports Sermitsiap oqaaseqartinniarpaa.
Greenland Airports: Itersaq iluarsineqarpoq
Pingasunngornermi ullaap tungaani timmisartuussinerit matuneqarnerannut mittarfiup itersaqarnera pissutaasoq, Greenland Airportsimi attaveqaqatigiinnermut pisortap Mikkel Bjarnø Lundip Sermitsiamut uppernarsarpaa.
Pingasunngornermili ullup-qeqqa sioqqullugu itersaq iluarsisimasoq nassuiaavoq:
- Piffissap ingerlanerani itersanikkiartorsimavoq.
- Ullaap tungaani taanna iluarsaanneqarpoq paneriartorporlu,taava kingorna mittarfik ammaqqinneqassaaq, Mikkel Bjarnø Lund oqarpoq.
Mittarfiup nutaap itersanissimanera pillugu attaveqaqatigiinnermut pisortaq ima nangippoq:
- Soorunami tamanna misissoqqissaassavarput, aamma siunissami taamatut pisoqaqqinnginnissaa qulakkeerniarlugu iliuuseqartoqartariaqarnersoq misissussavarput.
