NUTARTIGAQ: Timmisartoq nakkarpoq - inuit marluk annaanneqarput
Timmisartoq tyskisut nalunaarsorsimasoq ataasinngormat Qaqortup kujataa-kippasissortaata imartaanut nakkarpoq. Issittumi Sakkutooqarfiup marlunngormat timmisartup ajutoortup assingi Facebookimut ikkuppai.
Qaqortup kujataa-kippasissortaata imartaani inuit marluk navianartorsiortut umiarsuup alapernaarsuisup Tritonip gummibådiata sumiissusersisinnaasimavai. Assi toqqorsivimmit.
Arktisk Kommando
Malugiuk: Assit saqqummersinneqartut pillugit paasissutissat nutarterneqarput
Ataasinngormat Qaqortup kujataa-kippasissortaata imartaani timmisartoq nakkarsimavoq. Issittumi Sakkutooqarfik Facebookimi taama nalunaarpoq.
Issittumi Sakkutooqarfik naapertorlugu timmisartuminngaannit tyskisut nalunaarsorsimasumit inunnik marlunnik ilaasulimmit, nal. 12:17 nalunaarut MAYDAY Issittumi Sakkutooqarfiup tigusimavaa.
Timmisartoq Narsarsuarmukartilluni nalunaarutip MAYDAY-ip nassiunnerata kinguninngua imaanut nakkarsimavoq:
- 30 minutsiinnaat qaangiuttut Triton-ip gummibåd-ia annaassiniarluni nakkarfimmut apuussimavoq inuillu imaanit qaqissinnaasimallugit. Annaanneqartut Qaqortup napparsimmavianukaanneqarput peqqinnissaqarfimmullu tunniunneqarlutik. Kingorna Kalaallit Nunaani Politiit suliassaq paasiniaanerlu ingerlateqqissavaa, Issittumi Sakkutooqarfik allappoq.
Ikkussaq nutaaq
Triton-imi inuttaasut erngerlutik sukkasuumik suliassaqarfiup tungaanukarnerinik annaanneqartullu peqqinnissaqarfiup ingerlateqqipallannerinut suliaqarluarnerini Issittumi Sakkutooqarfiup nersualaarpai.
Issittumi Sakkutooqarfik marlunngormat timmisartup nakkarsimaneranik sukumiinerusumik paasissutissiivoq.
Timmisartoq Challenger annaassiniarnermi aamma pingaaruteqarsimasoq Issittumi Sakkutooqarfiup ikkussami nutaami erseqqissarpaa, taamatuttaarlu Naviair aamma Kalaallit Nunaanni Politiit qujaffigineqarput.