Nuuk: Pisuttuartarfiit 66-it atuakkami nutaami
Atuakkami nutaami Nuup Kangerluani pisuttuartarfiit assigiinngitsut 66-it misigisassarsiornissamut aqqutissiuipput.
Jakob Abermannip Østrigimiup qaqqasiortartup Nuup eqqaani qaqqat alutoreqai.
Assiliisoq: Jakob Abermann
Østrigimiu qaqqasiortartoq Jakob Abermann pisuttuartarfiit pillugit najoqqutassiamik aappassaat saqqummersitsivoq, taannalu pisuttuarfiusinnaasunik amerlanerusunik periarfissanik peqarluni. Qaqqani tammarnissaq pinngitsoortinniarlugu atuakkami assit, GPS-ikkut aqqutit allaaserisallu amerlasuut takuneqarsinnaapput.
- Maanga nuukkama tupigusuutigaara nunap qanoq kusanartiginera, taamaakkaluartorli paasissutissat ikittuinnaalutik, Jakob Abermann, ukiorpassuarni Nuummi najugaqartoq, nassuiaavoq.
Nunat aqqi kalaallisut
Jakob Abermann 2018-imi pisuttuarfissanut najoqqutassiaq sukumiisoq tuluttut saqqummersippaa, maannalu atuakkami nutaami nutartikkami sumiiffiit kalaallisut aqqi ilanngunneqarput.
Pisuttuarfigineqarsinnaasut 66-it ilaat atuakkami takuneqarsinnaapput.
- Sumiiffiit kalaallisut aqqi tusarnerlutillu isumaqarluartut isumaqarpunga. Suliap ingerlanera taakkua samminerat assut nuannerpoq, qaqqasiortartoq Østrigimiu oqarpoq, nangipporlu:
- Taama ittumik suliaqarluni nammineq akisussaaffigalugulu atuakkiorfiuteqarneq soorunami imaannaanngilaq: Nalunaaquttap akunneri hunnorujulippassuit sulisariaqarpoq aningaasallu amerlanerit nammineq kaasarfimmiit pissarsiarineqartariaqarput; qujanartumik Visit Nuuk aamma Grønlandsbankenip Inuussutissarsiornermut Aningaasaateqarfia tapiissuteqarput.
Pisiarineqarsinnaalingajalersoq
Atuagaq Nuummi pisiniarfinni pisiarineqarsinnaalingajalerpoq.
Aappalaartumik nalunaaqutserneqarsimasut Nuup Kangerluani pisuttuarfigisinnaasanut innersuussutaapput.
- Nuup eqqaani pinngortitaq qanoq kusanartigisoq qanorlu orneriaannaaneqartigisoq nunarsuarmiut paasigaluarpassuk Nuummi pisuttuarluni takornariartitsisarneq annertusisinnaavoq, atuakkiortoq oqarpoq.
