Nuuk Pride juunimi 2025-mi aaqqissuunneqaqqissaaq
Ulloq nalliuttorsiorfik illoqarfiit pingaarnersaanni qaqugu pissanersoq inissippoq. Juunip 28-ani Nuuk Prideqalerpat peqataasoqarluassasoq Sipineq+-ip neriuutigaa.
Kalaallit Nunaanni 2010-miilli ingerlaaqatigiinneq Pride aaqqissuunneqartarpoq, aallaqqaammut 'Gay Pride'-mik taaneqartarluni.
Assi: Leiff Josefsen
- Arfininngornermi juunip 28-ani 2025 Nuuk Pridernerani aqquserngit qalipaatinik, nuannaarnermik ataatsimoornermillu ulikkaarumaartut neriuutigaarput – neriuppugullu peqataassasusi, suliffeqarfittut, peqatigiiffittut imaluunniit inuinnartut!
Sipineq+ qaaqqusissummini taama allappoq, taakku ikinnerussuteqartut inuiaqatigiinni inissisimaffiannik suliaqartuupput.
- Ulloq assigiinngiiaassusermik nersuisoq, paasinninnermik ataatsimoornermillu siuarsaasoq ataatsimoorluta pilersitsigu. Tapersersuinersi attaveqaatitigut siuarsarsiuk, attaveqaatisi qaaqqusigit, Nuuk Pride 2025-lu puigunaatsuutinnissaanut peqataallus., Sipineq+ kaammattuivoq.
New Yorkimi suiaaqatiminnoortut politiinit malersorneqarnerminnik 1969-imi juunip 28-ani akerliussutsimik takutitsimmata ulloq taannarpiaq nunarsuarmi sumiiffiit ilarpassuini LGBTQ-nik aaqqissuussinernut ullorititaalerpoq.
Nuummi pisussaq HX Foundationimit Kommuneqarfik Sermersuumillu kajumissutsimik sulinermut tapiissutinit aningaasaliiffigineqarpoq.
