Nuuk: Qinersisinnaasut 20 procentii nal. 15:00 qinersimapput
Nuummi qinersinermut aqutsisoq, Bea Mølgaard Lennert, neriuppoq qinersisartut pisussaaffimminnik naammassinninniarlutik soraarnertik ilutigalugu amerliartulissasut. - Taamak qinersiartortukitsigiinnassappat, kommunalbestyrelsimut kingullermik qinersinermi Nuummi qinersisimasut 56,3 procentiusut ataallugit qinersisoqarsinnaanera aarlerinarsinnaavoq, taanna oqarpoq.
- Nalunaaquttap akunneranut agguaqatigiissillugu procentit pingasukkaarlugit qinersiartortut amerliartorusaarput. Kisianni isumalluarpunga, tassami maannakkut inuit suliffimminnit asuukaalerput, neriuutigaaralu tamannna ilutigalugu Nuup timersortarfianukarlutik innuttaasutut pisussaaffimminnik isumaginnikkiartukaassasut, qinersinermi aqutsisoq Bea Mølgaard Lennert Sermitsiamut oqarpoq.
Assi: Jensine Berthelsen
Politikki eqqarsaatigissagaanni, nammineq kommunerisamit innuttaasunut qaninneqanngilaq.
Ullumikkut demokratiip ullua nalliuttorsiutigaarput kommunalbestyrelsimut qinersinermik malunnartillugu. Kisianni Nuummi qinersivimmi innuttaasut qinersisinnaasut amigaataapput.
Nal. 15:30 missaani inuit ikittuinnaat qinersivimmiipput Nuup timersortarfiani
Assiliisoq: Jensine Berthelsen
Aggiagitso innuttaasutullu pisussaaffissi isumagalugu
Taamaattumik Nuummi qinersinermut aqutsisoq Bea Mølgaard Lennert innuttaasunut kaammattuivoq tamat oqartussaaqatigiinneranni pisinnaatitaaffitsik atorluaqqullugu, qinersineq aqqutigalugu:
- Kingullermik kommunalbestyrelsimut qinersinermi Nuummi qinersiartortut 56,3 procentiinnaapput. Aarleqqutigisinnaavara 56,3 procentit taakku ataanneqassasut, qinersiviup matunissaata tungaanut nal. 20:00, qinersiartorlutik takkuttartut taamak ikitsigiinnassappata.
20 procentiinnaat nal. 15:00 qinersiartorsimapput
Qinersinermut aqutsisoq Bea Mølgaard Lennert oqaluttuarpoq nal. 15:00 qinersisinnaasut 20 procentiinnaat Nuummi timersortarfimmut qinersiartorsimasut.
- 2021-imi qinersisinnaasut 14.133-iupput maannali 2025-imi 14.614-iullutik. Neriuutigaara inuit maanna soraarnertik ilutigalugu qinersiartorlutik takkussuutilissasut, tassami maanna inuit amerlanerit soraakaapput, qinersinermut aqutsisoq oqarpoq.
