Nuummi akunnittarfik 25 millionit koruunit nalinginut nutarterneqassaaq
Qaammat ataaseq qaangiuppat Hotel Hans Egede Nuup qeqqaniittoq nutarterneqangaassaaq. Hotel Hans Egedep saqqaa nutaanngussaaq, tamannalu siunissami pitsaanerusumik atorneqarsinnaanissaanut qulakkeerutaassaaq.
Hotel Hans Egedep saqqaa nutaanngorlunilu nutaanik igalaaqalissaaq. Suliniut 25 millionit koruuninik akeqarpoq.
Toqqorsivimmit assiliartaliussaq: Leiff Josefsen
Akunnittarfimmik illoqarfiit pingaarnersaanni qitiusumik inissisimasumik piginnittut 25 millionit koruuninik aningaasaliillutik Hotel Hans Egede ulluminut naleqquttutut kajungernartutullu isikkoqalernissaa qulakkeerniarpaat.
Akunnittarfik 10.000 kvadratmeterisut angitigisoq Polarbo A/S-imit, Bolette Juhlimit Helge Tangimillu aqunneqartumit pigineqarpoq. Nutarterineq ukiup ataatsip ingerlanerani naammassineqartussaasoq nalunaarutigineqarpoq.
- Saqqaata nutarterneqarnissaa piffissanngorpoq, Helge Tang nassuiaavoq, aamma erseqqissarpaa aningaasaliineq annertooq „akunnittarfimmik piujuartitsinerusumik ingerlatsinermik qulakkeerissasoq, igalaat nutaat avatangiisinullu mingutsitsinnginnerusumik saqqaqarnissamik akunnittarfiup takorluugaanik nukittorsaassammat".
Unammillerneq allanngoriartorpoq
Akunnittarfinni unammillernerup allanngoriartornerani aningaasaliineq Helge Tangip isumassarsiatsialaasoraa.
- Nalunngilarput unammillertoqalissasoq, tamannalu takornariartitsinermut tamarmut iluaqutaassaaq, Helge Tang oqarpoq nangillunilu:
- Akunnittarfinnik nutaanik pilersaarusiorneq sukkanerusumik ingerlanneqarsimanngimmat taamaallaat ajuusaarutigaarput, sumilu sanaartornissamut akuersissummik pissarsisoqarsinnaanersoq qangali aalajangerneqareersimasariaqaraluartoq isumaqarpugut, taamaalilluni nutaanik akunnittarfiliortoqarsinnaaniassammat.
