Nuummi aqqusinermi angallannermi ajutoornerit ulloq unnuarlu nalunaarusiami initupput
Imigassartorsimalluni biilerneq ajutoornerlu politiinut nalunaarutigineqartut ilagaat.
Assiliisoq: Leiff Josefsen
Nuummi ulloq unnuarlu kingulleq aqqusinermi angallannermi arlaleriarluni pisoqarsimasoq ilaatigut unnerluutiginninnermik kinguneqartumik politiit pigaartuisa pisortaat Poul Kreutzmann tallimanngornermi ullaakkut oqarpoq.
Politiit Nuummi suliffeqarfik biilinik aporneqarsimasoq sisamanngornermi nalunaaqutaq 17.26 nalunaarfigineqarput.
Biilimik aquttoq sumiiffimmit ingerlaannarsimavoq, politiilli kingorna nassaarigaat aquttorlu akiligassinneqassasoq pigaartut pisortaata paasissutissiissutigaa.
Sisamanngornermi unnukkuani kingusinnerusukkut nalunaaqutaq 21.59 angut 29-nik ukiulik Nuup ilaani Nuussuarmi unitsinneqarpoq.
Angut imigassartorsimanermut uuttuummut supisinneqarnerani imigassartorpallaarsimasoq paasineqarpoq, taannalu imigassartorsimalluni biilersimasutut unnerluutigineqarpoq.
Kinguninngua nalunaaqutaq 22.15 politiinut nalunaarutiginnittoqaqqippoq. Nuummi Brugsenip kommunillu allaffiata akornanni biilinik ajutoortoqarsimasoq nalunaarutigineqarpoq.
Politiit sumiiffipput ornigukkamik biilimik ajutoortumik aquttoq ajutoorfimmit qimagussimasoq pigaartut pisortaat oqarpoq.
Biilimik aquttuussagatinneqartoq illoqarfimmi adressemi nanineqarpoq. Angut taanna 20-nik ukiulik imigassartorsimalluni biilersimasutut unnerluutigineqarpoq, taamaattumillu eqqartuussivimmi sassartinneqartussanngorluni.
Ajutoornermik takunnissimasinnaasunik politiit saaffiginneqqullugit kajumissaarpaat, politiillu uunga sianerfigineqarsinnaapput: 70 14 48.
