Nuummi aqqusinermi angallannermi najoqqutassamik qullitaaqqilersoq
Biilit angallannerpaaffianni aqqusinermi tunuleriaatilertarneq annikillisarniarlugu Kommuneqarfik Sermersuumit iliuuseqarfigineqarpoq. Eqalugalinnguit aqquserngani angallannermi 2026-mi nutaamik najoqqutaqalissaaq, suliarlu aallartereerluni.
Nuummi Eqalugalinnguit nermallaata tungaanut aqqut.
Assi: Leiff Josefsen
Nuummi Eqalugalinnguani nermallak oqaluttuaannanngussaaq.
Biilit angallannerpaaffianni tunuleriiaattoqartarnera annikillisinniarlugu nermallak 1989-imi sanaajusoq taarserlugu aqqusinermi angallannermik najoqqutassaqalernissaa Kommuneqarfik Sermersuumit maanna sulissutigineqaleruttorpoq. Kommuneqarfik Sermersooq nittartakkamini taama paasissutissiivoq.
Eqalugalinnguani aqqusinermi angallannermi najoqqutassaq 2026-mi atulernissaa naatsorsuutigineqarpoq.
- Aqqusineq silinnerulissaaq, taamaasilluni sangusarissanut nutaanut inissaqassalluni aamma qeqqani qeqertaasaq peerneqassaaq. Taamatuttaaq imermut, innaallagissamut oqarasuaatinullu attaveqaasersuuteqarpoq, taakkualu tassunga atatillugu aamma pisarialimmik nuunneqassallutik, kommune tusagassiuutinut nalunaarummi allappoq.
Qaartiterineq aallartinneqassasoq
Aqquserngup suliarineqarnerani angallanneq aqqutissiuukkumallugu betoninik aqquserngit sinaakkusersorneqassasut kommune paasissutissiivoq. Suliaqarnerup nalaani bussit ingerlaarfii aamma allanngussapput, kiisalu taxat nermallaap eqqaani uninngasarfiat aamma biilinit uninngaffigineqarsinnaajunnaassalluni.
- Tassunga atatillugu akornusersuineq ajuusaarutigaarput kisiannili innuttaasut paasinninnissaat neriuutigalugu. Kingullertut minnerunngitsumillu Kommuneqarfik Sermersuumit kajumissaarutigineqarpoq kikkut tamarmik mianersorlutik angallatissasut aamma angallattut allat minnerunngitsumillu sumiiffimmi meeqqat eqqarsaatigissagaat, kommune allappoq.
Nuuk Entreprenøren qitiusumik suliarinnittuuvoq, Brøndumilu FJ-ELilu ledninginik suliarinnittuussallutik.
