POLITIIT
Nuummi Elgigantenimi Kop & Kande-milu tillinniartoqarsimavoq
Tallimanngornerup arfininngornerullu akornnanni unnuaq Nuuk Centerimi pisiniarfiit ilaanni tillinniartoqarsimavoq, tillinniat ajutoortoqartillugu aniguiffissiaq aqqutigalugu isersimapput. Kalaallit Nunaanni Politiit, suliami misissuillutik ingerlataqartut, innuttaasunut kaammattuuteqarput, NC-p eqqaani pasinartunik takusaqarsimagunik politiinut saaffiginnissasut. Tamatuma saniatigut politiit kaammattuuteqarput innuttaasunut atortunik akikitsunngorlugit tuniniaaffigineqassagunik piumasaqassasut pisinermut allagartaq tunniunneqassasoq.
Assiliisoq: Leiff Josefsen
Arngutit inuusuttut sisamat, tamarmik 15-20 missaani ukiullit tamarmillu qernertunik atisallit, unnuaq tallimanngornerup arfininngornerullu akornanni 01:00-01:30 missaani Nuuk Centerimi pisiniarfiit Elgiganten aamma Kop & Kande tillinniarfigisimavaat, Kalaallit Nunaanni Politiit nakkutilliisuutitaasa pisortaat Jørgen Madsen ilisimatitsivoq.
- Tillinniarneq pillugu kalerrinneqarpugut nal. 02.15, misissuinerlu piaarnerpaamik aallartipparput. Pisiniarfiit nakkutilliissutaat videot pigivagut, sulili misissuineq ingerlammat pinerluttuliortut sisamat taakku kinaassusaat saqqummiussinnaanngikkallarlutigu, oqaatigisinnaavarpulli tamarmik 15-20 missaani ukioqartuusut tillinniarnerminnilu qernertunik atisaqarsimasut, Jørgen Madsen oqarpoq, nangillunilu:
- Innuttaasoqarsimappat, unnuaq piffissap taaneqartup missaani Nuuk Centerip eqqaaniissimasunik, pasitsaassaqarsimagunillu,qinnuigaagut politiinut 701448-mut attaveqaqqullugit.
Elektroniskiusunik amerlasuunik tillinniarneqarsimasoq
Elgiganten-imit PS5, mobilit, ipads allallu atortorissaarutit elektroniskiusut tillinneqarsimapput.
Tassunga atatillugu vagtchef Jørgen Madsen innuttaasut kaammattorpai mianersoqqullugit, elektroniskiusunik atortunik akikitsuaqqamik tuniniaavigineqassagunik:
- PS5, mobiltelefon, ipad allat elektroniskiusullu neqeroorutigineqassappata, taava kaammattuutigaarput pisinermut uppernarsaat piumasarissagaat. Aamma neqeroorifigitittoqarsimaguni pasitsallunilu tillitanik tuniaaffigitissimasinnaalluni, politiinut attaveqartoqassasoq ilanngullugu kaammattuutigaarput.
Jørgen Madsen oqaluttuarpoq politiit misissuineq suli ingerlanneqartoq, aamma nakkutiginninnermut videot pissarsiatik misissoqqissaarneqartut, kisianni suli misissuineq pissutigalugu tillinniat kinaassusaat saqqummiunneqarsinnaanngikkallartut.
