Nuummi innaallagiaarunnera pisiniarfinnut akisoqaaq

Nuummi innaallagiaarukkaangat pisiniarfiit akisunaartarpaat, pisiniarfimmimi nutaaliaasumi innaallagiaarukkaangat suulluunniit ingerlasinnaanngillat.

- Arfininngornermi ullaap tungaani innaallagiaarummat pisiniarfiit matupallappavut, tuniniaanermut pisortaq Dennis Larsen nassuiaavoq. Innaallagiaarussimatillugulu pisiniarfiit ammaqqinniarnerat piffissamik atuiffiusarpoq.

- Nioqqutissat nillataartitsivinniittut qerititsivinniittullu ajornartorsiutaanerpaasarput, taamaattumik pisiniarfiit matoqqagaluartut sulisut ulapittarput nioqqutissat ilitsivinnit nillataartitsivinnut qerititsivinnullu containerinut nuuttariaqartaramikkik. Tamatuma saniatigut innaallagiaqaqqilerneratigut atortut tamakkerlugit aallarteqqinniarnerat ilungersunartorsiortitsisarpoq.

Nillataartitsiviit ilungersunartorsiortut

- Illoqarfiup qeqqani Akikip ammatinnissaa arfininngormat unnukkut iluatsipparput, pisiniarfiilli allat aatsaat sapaammi ullaakkut ammaqqinneqarput. Suli unammilligassaqarpugut nillataartitsiviit marlussuit matoqqanermik kingornagut aallartinneq ajornarsigamik, teknikerilli suliamik suliaqarput, taamaattumik naatsorsuutigaara sapaatip ingerlanerani aaqqiissutissaq nassaarissallugu. 

Neriniartarfiutittali Sunset Boulevardit marluk matoqqatinnissaat aalajangiupparput.

Oqartussaasut innaallagissamik sipaarniarnissarput innersuussutigaat, uagutsinnullu pingaaruteqarneruvoq pisiniartut burgerinik nerinatik iffiukkamik nerinissaat, tuniniaanermut pisortaq nassuiaavoq. 

Atuisut sulisullu nersualaarneqartut

- Atuisut aamma nersualaartariaqarpakka, matunerpummi eqqissisimalluinnarlutik tiguaat. Sulisut aamma nersualaarneqartariaqarput, ullormimi unnuamilu kingullermi tamaviaarluinnarlutik suligamik. Tamanna nuanneqaaq, qutsavigineqangaartariaqarpullu.

- Innaallagiaarukkaangatta akikinneruneq ajortoq aamma nassuerutigisariaqarparput. Pingaarnertut pisiniarfiit matoqqagaangata kaaviiaartitatsinnik annaasaqartarpugut, aammali nillataartitsiviit qerititsiviillu ilioqqaaviit imaarneqartussanngoraangata soorunami immikkut suliassarpassuaqartarluni.

Taamaakkaluartorli innaallagiaaruttoqarnera tamatumuuna anigorluarparput, pingaartumik sulisut ikiuulluarnerat pissutigalugu, Dennis Larsen oqarpoq.

Brugseni aamma aningaasanik annaasaqartartoq

Brugsenimi tuniniaanermut attaveqaqatigiinnermullu pisortaq Benny Reffeldt Otte aamma taama isumaqarpoq.

- Tamanna akisuvoq, matusariaqarnerpummi kaaviiaartitatsinnik annaasaqaatigisaratsigu. Sulisut innaallagiaarummat saliiartorlutillu nioqqutissanik nussuiartortinneqarput, aatsaallu arfininngornermi ualikkut soraarlutik.

- Pisiniarfitsinnili tamani sulisut marluk unnuaq tamaat pigaartuutitaapput kalerrisaarutit atorsinnaanngimmata. Sapaammili ullaakkut nalinginnaasumik ammavugut – sumiiffinnilu amerlanerni aamma taamaappoq. Qinngutsinnili pisiniarfimmi qarasaasiat suli ajornartorsiutaapput. 

- 2021-mi annertuumik innaallagiaaruttoqarnerani tamanna misilereeratsigu, 2024-mili juullikkunni misigeqqissallugu ilimagisimanngikkaluarpara, Benny Reffeldt Otte, Brugsenimi sulisoq, oqarpoq.