Nuummi mittarfissap illorsuata nutaap atulernissaa kinguartinneqarpoq
Pilersaarutit malillugit Nuummi mittarfiup illorsua nutaaq ataasinngornermi atulertussaagaluarpoq, qatserisartulli oqaaseqaataat pissutigalugit tamanna kinguartinneqarallarpoq.
Mittarfiup illorsua nutaaq ataasinngornermi atulertussaagaluarpoq.
Assiliisoq: Greenland Airports
Nuummi mittarfiup illorsuata nutaap atoqqaartinneqarnera ataasinngornermi pisussaagaluarpoq, tamannali kinguartinneqarpoq.
Tamanna isumaqarpoq Nuummiit angalasut tamarmik mittarfiup illuutaa nutaannginneq aallariartorfigisarallassagaat, Greenland Airports tusagassiuutinut nalunaarummi allappoq.
Angallannermut Aqutsisoqarfiup timmisartoqarfissami nutaami isumannaallisaanermut tunngasut akuersissutigai, qatserisartulli timmisartoqarfiup illorsuassaata atorneqalernissaa sioqqullugu suliassat suliarineqaqqaartussat pillugit oqaaseqaateqarput. Greenland Airportsip mittarfiup illorsua qaqugu ammassanersoq oqaatiginngilaa, kinguartitsinerli ’sivikitsuusoq’ oqaatigalugu.
Iluarsisassat piaarnerpaamik aaqqinneqarumaartut pisortaq Jens Lauridsen oqarpoq:
- Soorunalimi uggornarpoq pilersaarutit malillugit aqagu ataasinngornermi ammarsinnaannginnatta. Taamaakkaluartoq, oqartussaasut misissuinerat ataatsimut isigalugit ajunngitsumik ingerlapput.
- Isumannaallisaaneq akuersissutigineqarpoq, kisiannili ataasiakkaanik aaqqitassaqarluta, taakkulu sukkanerpaamik sulissutigissavagut, Greenland Airportsimi pisortaq, Jens Lauridsen oqarpoq.
Atulerfissaa nutaaq nalunaarutigineqassaaq
Greenland Airports erseqqissaavoq timmisartoqarfiup pisortat piumasaqaataat assigiinngitsorpassuit, soorlu ilusilersorneqarnermut, ikuallajasuunermut, avatangiisinut sulinermilu atugassarititanut tunngassuteqartut, naammassissagai. Aammattaaq atortorissaarutit nutaaliaasut amerlasuut, immikkut ilisimasaqarnermik uppernarsaatilinnik nalunaaquttap-akunnerpassuinilu sungiusarsimanermik pisariaqartitsisut, akuersissutigineqarnissaat inissinneqaqqaassaaq.
- Pilersaarusiaq annertuupilussuuvoq amerlasuunillu suliassarpassuaqarluni, nutaanik unammillernarsinnaasunik ingerlaveqarluni, tamaasalu angoqqaarlugit ammarsinnaalluta. Taakkuupput mittarfeqarfimmik ingerlatsinermi toqqammaviusumik piumasaqaatit, Jens Lauridsenoqarpoq.
Greenland Airportsip qaqugu atulersitsisoqassanersoq piaartumik nalunaarutigissavaa.
- Suliassaq annertooq unammillernartorlu
Angallannermut Aqutsisoqarfik allappoq timmisartoqarfiit ilaanni isumannaallisaasut sapaatiummat ualikkut akuerisaasimasut:
- Timmisartoqarfissap nutaap isumannaallisaanermut tunngasunik tamanik akuersissutiginninnissaa suliassaasimavoq imaannaanngitsoq; uagutsinnut oqartussaasunut, pingaartumik Greenland Airportsimut, piffissaq killilik atorlugu tamanik ataqatigiissaarinermik imaqarsimavoq, Angallannermut Aqutsisoqarfimmi pisortap tullia Christian Vesterager oqarpoq.
Aqutsisoqarfik ilisimatitsivoq mittarfimmi isumannaallisaanermut tunngasut allat akuerineqarnissaat qaammatini tullerni suliarineqassasut, Nuup mittarfiata nutaap 2.200 meterisut takitigisup pilersaarutit malillugit 2024-mi novembarip 28-ani atulersinneqarnissaa sioqqullugu.
