Nuummi mittarfiup illorsuartaa nutaaq ataasinngornermi ammartussanngorpoq
Nuummi timmisartoqarfiup illorsuartaa nutaaq akuersissutinik tamanik pissarsivoq. Taamaalilluni illorsuartaaq ataasinngornermiit atorneqarsinnaalertoq, Greenland Airports nalunaarpoq.
Nuuk Mittarfeqarfiat
Assiliisoq: Mittarfeqarfiit Kalaallit Nunaat
Nuummi terminali nutaaq kiisami akuerineqarpoq, aammalu ataasinngorpat ullaakkut ammarnissamut piareerluni. Greenland Airports Facebookimi quppernermini taama nalunaaruteqarpoq.
- Uagutsinnuinnaanngitsoq, kisianni Kalaallit Nunaat tamakkerlugu tamanna killiffiuvoq annertooq. Ilaasut sullitallu siulliit tikilluaqqunissaannut tulluusimaarlutalu nuannaartorujussuuvugut aammalu qilanaarpugut, Greenland Airportsimi CEO Jens Lauridsen, taama oqarpoq.
Terminali sapaatip-akunnerani matumani ammarneqartussaagaluarpoq. Akuersissutilli ilaat suli tiguneqarsimanngimmata ammaanissaq kinguartinneqartariaqarsimavoq.
Check-in akunnerit marluk sioqqullugit
Nuummiit timmisartuussinerit tamarmik ataasinngornermi juunip 24-aniit mittarfeqarfiup illorsuaniit nutaamiit ingerlanneqassasut ilisimatitsissutigineqarpoq. Nuummiit aallariartortussat taamaattumik aallarnissamit akunnerit marluk sioqqullugit check inertarnissartik eqqumaffigisussanngorpaat.
Greenland Airportsip nalunaarutigaa terminalip akiani biilit uninngasarfiat nutaaq ammalersoq aammalu maannamuugallartoq akeqassanani.
- Terminali akuerineqarlunilu ammaraluartoq, sanaartornermik suliaqarneq suli ingerlasussaavoq, Greenland Airports ilisimatitsivoq.
