Nuummi tallimanngornermi unnukkut eqqissiviilliortoqartoq
Nuummi sapaatip-akunnerata naanerani tusarnaartitsisoqarnera politiit ulapaarfigaat. Pigaartut pisortaat tusarnaartitsinermut tunngasumik oqariartuuteqarpoq.
Assi: Oscar Scott Carl
Qaammammi matumani sapaatip-akunnerata naanerani siulliuvoq, tamannalu Kalaallit Nunaanni Politiit ulapaarfigaat.
– Tallimanngornermi unnukkut unnuakkullu suliarpassuaqarpugut, pingaartumik Nuummi, pigaartut pisortaat Heini Jacobsen oqarpoq.
Unammilligassat amerlasuut imigassartorsimanermut tunngassuteqarput, ilaatigut tusarnaartitsinermut Akisuanerit Festivalimut atatillugu.
Eqqissiviilliortoqarnerani politiit inunnik arlalinnik unnerluutiginnipput. Inuit ilaat kamaqisut tigusaapput, politiinit isertitsivimmukaanneqarlutik aalakoorunnaarmatalu iperagaaqqillutik. Inuit marluk imigassartorsimallutik biilersimasutut tigusarineqarput.
Nussuarmi angutit marluk nakuusertut arfininngornermi ullaakkut nalunaarutigineqarput. Politiit aappaa tigusaraat, aappaalu kinaasimanersoq nalunngippasillugu.
Arfininngornermi tusarnaartitsinerit nanginneqassammata pigaartut pisortaat eqqaasitserusuppoq:
- Imikkasi mianersuukkisigit, allallu kissaatiginngisamik imikkannut ikisisinnaanerat pinaveersaartillugu, Heini Jacobsen oqarpoq.
Ikiaroornartunik assigisaannilluunniit imikkanut ikisisoqarsimanera tallimanngornermi unnukkut nalunaarutigineqanngilaq. Mianersornissarli pitsaanerpaasoq, pigaartut pisortaat erseqqissaavoq.
