Nuummi tillinniaqattaarnerit ingerlaannarput: Sakku una ilisaraajuk?
Arnat Igdluannut, Charoen Pornimut Iffiorferalammullu tillinniartoqarsimanera politiit nalunaarutigaat. Tillinniarnermi tillinniartup kuupii qimassimavaa. Nalunngisaqaruit politiit attavigikkit.
Tillinniap kuupii una Nuummi iffiorfimmit qimaagami qimappaa. Immaqa aatsaat pisiniarfimmi tillinniartoqarnerata kingorna pisiniarfimmiittut amerlanerulerput.
Foto: Grønlands Politi
Nuummi
tillinniaqattaarnerit ajoraluartumik ingerlaannarput. Maannakkulli tillinniap
sakkuni, suliami paasissutissiisinnaagunartoq qimassimavaa.
Politiit
sapaammi ullaap tungaa arfininngornerup unnuaata sapaatillu ullaavata akornanni
Nuup qeqqani piffimmi mikisumi tillinniartoqarneranik nalunaarutit pingasut
tiguaat.
Inuk Arnat
Igdluannut Kongevejimiittumi igalaaq aserorlugu isersimavoq. Suut
tillinneqarsimasinnaanerat suli nalunarpoq.
Sapaammi
ullaakkut neriniartarfimi Charoen Pornimi tillinniartoqarneranik kalerrisaarut
appittoq politiit nalunaarfigineqarput. Igalaat assiaqutaat aserorneqarsimavoq,
tassanilu tillinniaq aningaasanik tillippoq.
Tamatuma
saniatigut Iffiorferalammut, Blok O-miittumut tillinniartoqarpoq. Sanioqquttup
inuk iserniartoq naammattoorpaa. Ajoraluartumilli inuup qanoq isikkoqarnera
oqaluttuarisinnaanngilaa.
Sakkuni
puigoraa
Tillinniap
malugineqarsimanini immaqa paasisimavaa. Iffiorferalamminngaanneersullu matu
aserorneqarsimagaluartoq tillittoqarsimannginnera Sermitsiamut oqaluttuaraa.
Tillinniaq
ima anipallanniartigisimavoq, allaat kuupiini qimallugu.
– Pisumi
takunnissimasut pingasut tamaasa tusarfigerusuppavut. Takunnissimaguit
imaluunniit arlaannik nalunngisaqarlutik, taava attavigisigut, politiini
pigaartut pisortaat Preben Kleist oqarpoq.
Politiit
isumaqatigiissuteqarfigalugit kuupiip assilinera uani takutipparput,
atuartartullu arlaata ilisarisinnaassagaa neriuutigalugu. Taamaattoqarpat
politiit oqarasuaatip normua 701448 atorlugu soorunami attavigineqarsinnaapput.
