Angallannermut
Aqutsisoqarfiup Greenland Airports Nuup mittarfiani
timmisartunik aqutsisoqalernissaanik sivitsortumik
piumasaqaatigisaarpaa.
Aqutsisoqarfik
naalagaaffiup ataaniittumut Naviairimut timmisartunik aqutsinermik
qanoq atuutilersitsisoqarsinnaaneranik nassuiaammik suliakkiivoq.
Naviairip
Nuummut tunngasoq suliani 2025-mi januaarip qaammataani naammassivaa,
Naviairillu taanna Angallannermut Aqutsisoqarfimmut aamma Greenland
Airportsimut marsip 14-iani saqqummiullugu.
Qulequtaq
pineqartoq tamanna aatsaat taama pingaaruteqartigaaq, Nuummimi
Mittarfimmi maannakkorpiaq Angallannermut Aqutsisoqarfiup
killilersuinera pissutigalugu Air Greenlandip nunatta iluani
timmisartuussisarneranut ajornakusoortitsivoq.
Naviair
Kalaallit Nunaanni silaannakkut angallannermi paasissutissiinermik
Danmarkimilu mittarfinni annerni timmisartumik angallannermik
nakkutilliinermik maanna suliaqarpoq.
Greenland
Airports Nuummi mittarfimmit mittarfimmullu angallannermik nammineq AFIS-imik taaneqartartumik maanna atuivoq. AFIS-i silaannakkut
angallannermi aqutsisuunatit timmisartortartunut
ilisimatitsisuusartuupput. Timmisartunilli aqutsisut
taamaaliortarput, tamannalu mittarfimmi suliarineqarsinnaasunik
amerlanerulersitsillunilu isumannaatsuunerulersitsivoq.
Greenland
Airportsip timmisartunik aqutsisut ilinniarluarsimasut Nuummi
mittarfimmi nakkutilliisutut atulerpagit maannakkut killilersuinerit
sakkukillineqarsinnaapput. Taamaattumik Naviairip nalunaarusiaa
naapertorlugu qanoq taamaaliortoqarsinnaanersoq takulaariartigu.
Naviairimiit
ajornartorsiutit qanoq aaqqinneqarsinnaanerannik suliap
suliarineqarnikuunera erseqqissaatigissallugu pingaaruteqarpoq.
Aammattaaq Naviair suliassiissutigineqartoq
suliariumannittussarsiuunneqassappat nammineq
neqerooruteqarsinnaavoq, taamaattumik Naviairip suliamik
suliaqarnermini nammineq soqutigisat aallaavigisimannginneranik
oqaatigineqarsinnaanngilaq.
Timmisartumik
aqutsisut AFIS-inik suleqatillit
Naviairip
saqqummiussaani Nuummi silaannarmi angallannikkut aqutsinermut
aaqqiissutit marluk pingaarnertut allaatigineqarput.
Siullertut
TMA-mik taaneqartartut timmisartut qutsissusermut aalajangersimasumut
apparnissaasa tungaannut aqussavaat, tassanngaanniillu AFIS-it
timmisartumut paasissutissiisaarnerit nangissallugit. Periaaseq
taanna Norgemi atorneqarpoq.
Periutsip
aappaa, TWR/APP, tassa timmisartumik aqutsisut tamakkiisumik
isumaginnittunngorlugit Nuummi AFIS-it atorunnaarsinneqarlutik.
Sermitsiap
paasisaa naapertorlugu aaqqiissutissani taakkunani marlunni TMA,
Norgemi periuserineqartoq, ornigineqarneruvoq. Greenland
Airportsimiilli suliaq suli ingerlanneqarpoq, taamaammat
allanngortoqarsinnaalluni.
Norgemiut
silaannakkut timmisartunik aqutsinermut aaqqissuussaata
atorneqarsinnaaneranut imarpik qulaallugu mittarfissuup aappaata
ammarnissaa tunngaviit ilagaat.
-
Timmisartumik angallannermi nakkutilliisut Ilulissani Nuummilu
atorneqarsinnaasut iluaqutitaraa. TMA-nik immikkut
atorfinitsitsinngikkaluarluni timmisartumik aqutsisut ikinnerit
sulisorineqarsinnaapput, Naviair allappoq.
Timmisartumik
aqutsisut misilittagaqarluartut, ilaat nunani allaniittut,
atorfinitsinniarneqartussaassapput. Taakkulu sapaatip-akunnerini
arfineq-marlunni arfineq-pingasuniluunniit sivikitsumik
ilinniartinneqassallutik.
Taava
FIC-imik suliaqartunik timmisartumik aqutsisunngornissaannut
ilinniartitsisuussapput. FIC-imik suliaqartut tassaapput Naviairimi
sulisut Kalaallit Nunaanni silaannakkut angallannermi
paasissutissanik tunniussisartut. Inuit taakkua
ilinniarteqqinneqarnissaat sapaatit-akunnerini 19-ini ingerlassaaq.
Naviair
TMA-mik suliassinneqarpat, sulisut Naviairimi Issittumilu
Sakkutooqarfiup qullersaqarfianniissapput. Naviairip nalunngilaa sumi
issiasassanersut — assiliartami ataaniittumi issiaviit sisamaat
tallimaallu:
Assi Naviair-ip misissuineranit.
Periuseq
akisooq: Timmisartumik aqutsisut AFIS-inik suleqateqanngitsut
Siunnersuutip
aappaa, TWR/APP, tassa timmisartumik tamakkiisumik aqutsisoqalerluni
AFIS-inik atuiunnaarneq.
-
Timmisartornermik nakkutilliinerup mittarfimmilu nakkutilliinerup
ataatsimoortinneqarnerat Danmarkimi nalinginnaavoq, ullup
ingerlanerani angallaffiunngitsuni taakku marluk timmisartumik
nakkutilliisumit ataatsimit suliarineqarsinnaapput, Naviair oqarpoq.
Timmisartumik
angallannermik nakkutilliinermik tamakkiisumik atuutilersitsineq
akisunerullunilu ilinniartinneqarnerusariaqartoq, aamma pitsaanerusoq
silaannakkut angallannermik immikkut ilisimasalik Hans Christian
Stigaard Sermitsiap allaaserisami siuliani apersorneqartoq oqarpoq.
-
Timmisartornerup aqunneqarnissaanut aaqqiissut sorlerluunniit
toqqarneqaraluarpat, tamanna maannakkut atuuttunut sanilliullugu
pitsanngoriaataassaaq erseqqissumik, Hans Christian Stigaard oqarpoq.
Periarfissat
taakku marluk suliarineqareerpata Naviair naapertorlugu ukiut marluk
missaat ingerlareersimassapput. Mittarfimmut ullumikkut
killilersuinernik eqqorneqareersimasumut aappaagulu aasaru
timmisartuussinerit amerlanerpaaffiulerpata
ingerlaqqissinnaalertussap piffissaq sivisooq atortariaqarpaa,
Naviair allappoq.
Allaaserisami
eqqaaneqarpoq aaqqiissutissamik utaqqiisaasumik
pilersitsisoqarsinnaasoq, tamanna pitsaanerpaajussanngikkaluartoq
piffissamili sivikitsumi mittarfimmut iluaqutaasinnaavoq.
Timmisartornermik
nakkutilliisut timmisartumik nakkutilliisarput, kisianni silaannaap
qanoq inneranik malinnaasinnaajumallutik radareqannginnamik.
Naviairip
Københavnimiit timmisartunik nakkutilliinermik pilersitsinissaq
eqqarsaatigisimagaluarpaa, isumassarsialli itigartinneqarpoq
ajornartorsiutaalersinnaasut arlallit pissutigalugit.
Aki
suli ilisimaneqanngitsoq
Timmisartumik
angallannermik aqutsineq Nuummi mittarfimmut
eqqugaarujussuarsimasumut iluaqutaassasoq illuatungeriit tamarmik
isumaqatigiissutigaat.
Naviairip
aaqqiissutissat pingaarutillit marluk misissorneranni tamanna
soorunami akueraa. Ajoraluartumik aningaasat kisitsisillu
taakkununnga attuumassuteqartut allakkamit Sermitsiap
pissarsiarisaanit peerneqarsimapput.
Naviairip
suliassamut neqerooruteqarsinnaaneranut aningaasatigut soqutigisai
eqqarsaatigalugit, paasissutissat taakku peerneqarput,
Naviairip
aamma oqaatigaa naalagaaffiup timmisartoqarfiliornissamut
ingerlatsinermullu akiligassat akilersinnaaneri nalinginnaanngitsoq,
kisiannili periarfissaasoq.
Naalagaaffik
Namminersorltilluunniit Oqartussaasut aningaasaliinngippata Greenland
Airportsip, timmisartortitseqatigiiffiit ilaasullu akornanni
aningaasat nassaarineqassapput.
Imaluunniit
timmisartunik aqutsisoqalernissaq sussaaginnarneqassaaq.
Ineqarnermut,
attaveqarnermut isorliunerusunullu Naalakkersuisoq Aqqaluaq B. Egede
(IA) Danmarkimut novembarip 17-ianniit 21-anut tikeraarpoq. Tassani
Danmarkimi angallannermut ministeri Thomas Danielsen (V), aamma
Trafikstyrelsenimit Naviairimillu aallartitat ataatsimeeqatigai.
Sulilu uppernarsarneqarsimanngilaq Nuummi timmisartunik
aqutsisoqalernissaq tikeraarnermi oqaluuserisassanut ilaanersoq.
Naviair
aamma Greenland Airports maannakkut timmisartunik aqutsisoqalernissaq
pillugu itinerusumik oqaaseqarusunngikkallarput.
