Nuummit nunanut allanut timmisartuussinerit unitsinneqarput
Danmarkimi angallannermik aqutsisoqarfiup Nuummi mittarfimmi sillimaniarnermut akuersissutini tunuartippaa.
Nuummi mittarfeqarfik
Assiliisoq: Mittarfeqarfiit Kalaallit Nunaat
Nuummi mittarfiup illorsuartaava isumannaallisaanikkut ajornartorsiuteqarpoq.
Danmarkimi angallannermik aqutsisoqarfiup Nuummi mittarfimmi sillimaniarnermut akuersissumminik tunuartitsisimanera pissutigalugu, Nuummit nunanut allanut timmisartuussinerit unitsinneqarallartut, Air Greenland nittartakkamini pingasunngornermi ilisimatitsivoq.
- Greenland Airportsip Air Greenlandimut nalunaarutigaa, Danmarkimi angallannermik aqutsisoqarfiup Nuummi mittarfimmi sillimaniarnermut akuersissutini tunuartissimagaa.
- Tamassuma nassataraa Nuummit nunanut allanut timmisartuussinerit pisinnaajunnaarnerat, Air Greenland allappoq.
Tamanna pillugu ullumi aggustip 14-iani Iqalunnut timmisartuussinissaq pilersaarutaareersoq unitsinneqarpoq, Iqalunnullu timmisartuussineq sumiiffinnit allanit Nuup avataanit ingerlanneqarsinngilaq, tassami timmisartuussinissamut isumaqatigiissut taamaallaat Nuup Iqaluillu akornanni pisinnaasutut akuerineqarnikuummat, ingerlatseqatigiiffik nangilluni ilisimatitsivoq.
Ilaasussat eqqugaasut pillugit aaqqiissummik nassaarniartoqarpoq, tamannalu piareeriarpat angallannermut pilersaarut nutaaq Air Greenland sinnerlugu Greenland Travelip suliarisaa nalunaarutigineqassaaq, Air Greenland allappoq.
Pisoq "ajuusaarnartutut" ingerlatseqatigiiffiup oqaatigaa.
Air Greenland naapertorlugu pisoq kingusinnerpaamik marlunngornermi aggustip 20-ani aaqqiivigineqassasoq Greenland Airportsip naatsorsuutigaa, taassumalu kingorna kingumut Nuummit nunanut allanut, tassalu Iqalunnut Keflavikkimullu timmisartuussisarnerit nangeqqissavaat.
Greenland Airportsip oqaaseqaateqarnissaa Sermitsiap sulissutigaa.
